FLASH
Shkruar nga Pamfleti
Sulmi ndaj News24 dhe mediave të tjera të Focus Media News ka bërë jehonë në mediat ndërkombëtare.
Televizioni polak ‘TVP World’ ka raportuar gjerësisht mbi operacionin policor, duke theksuar shqetësimin e institucioneve të lirisë së shtypit në Ballkanin Perëndimor.
Sipas shkrimit të ‘TVP World’, operacioni policor ndaj një prej grupeve më të mëdha mediatike në Shqipëri është dënuar gjerë nga organizatat e gazetarëve në rajon.
Media polake shkruan se “policia rrethoi godinën e Focus Media News, ndërpreu energjinë elektrike dhe sinjalin e News24, duke penguar gazetarët të hynin në redaksi e të vijonin punën. Ngjarja është parë si një kërcënim i drejtpërdrejtë ndaj lirisë së shtypit”.
TVP World i kushton hapësirë të veçantë reagimit të Rrjetit SafeJournalists, që përfaqëson shoqatat dhe sindikatat e gazetarëve nga gjashtë vende të Ballkanit Perëndimor.
Në deklaratën e tyre, ata kërkojnë heqjen e menjëhershme të bllokadës, rikthimin e energjisë dhe garantimin e aksesit të lirë të gazetarëve në vendin e punës, si dhe shpjegim publik nga autoritetet mbi bazën ligjore të këtij veprimi.
“Çdo masë ndaj medias duhet të ndërmerret vetëm në përputhje me procedurat ligjore, nën mbikëqyrjen e gjykatës dhe me ndërhyrje minimale në aktivitetin gazetaresk”, citon TVP World për reagimin e organizatës.
Lini një Përgjigje