FLASH
Shkruar nga Pamfleti
Një skandal i ri ka tronditur futbollin italian, pasi janë ngritur akuza ndaj dizenjatorit të gjyqtarëve në Serinë A për përzgjedhje të qëllimshme të arbitrave që favorizonin Interin. Çështja është bërë tema kryesore e diskutimit publik në Itali dhe ka tërhequr vëmendjen edhe të institucioneve shtetërore.
Ministri për Sportin, Andrea Abodi, ka reaguar përmes një postimi në rrjetet sociale, duke theksuar rëndësinë e transparencës dhe trajtimit të barabartë në raste të tilla. Ai paralajmëroi se do të ketë pasoja nëse akuzat rezultojnë të vërteta.
“Ekziston vetëm një mënyrë për të mbrojtur sistemin sportiv në të gjitha aspektet e tij dhe për të respektuar tifozët, entuziastët dhe dashamirësit e sportit, duke filluar me futbollin: transparencë, veprim në kohë dhe trajtim të barabartë kur përballen me akuza për mosrespektim të rregullave sportive, veçanërisht kur ato kanë implikime të mundshme penale. Dhe ta bëjmë gjithmonë dhe me të gjithë!”, u shpreh Abodi.
Sipas tij, hetimi i Prokurorisë së Milanos ka nisur pas një ankese të bërë nga një ish-anëtar i Shoqatës Italiane të Gjyqtarëve. Megjithatë, ai ngriti shqetësime për mënyrën se si është trajtuar kjo ankesë brenda strukturave të futbollit.
“Lexova, si të gjithë ju, zhvillimet që dolën nga hetimi i Prokurorisë të Milanos, i cili filloi me ankesën e një ish-anëtari të Shoqatës Italiane të Gjyqtarëve. Duke i lënë autoritetet gjyqësore të bëjnë punën e tyre dhe pa dashur të futem në meritat e veprimeve të dizenjatorit Roki, aspekti më i rëndë që del është mënyra se si u trajtua vetë ankesa brenda sistemit të futbollit. Deri më tani, nuk ka pasur asnjë përgjigje publike, ashtu siç nuk e dimë se kush e mori ankesën dhe cili organ u caktua për të verifikuar ekzistencën e saj”, deklaroi ai.
Ministri kërkoi gjithashtu informacion zyrtar nga Komiteti Olimpik Italian për të sqaruar situatën sa më shpejt.
“Prandaj pres që të marr informacion zyrtar nga Komiteti Olimpik lidhur me këtë çështje sa më shpejt të jetë e mundur. Nëse vërtetohen përgjegjësitë, nuk mund të mos ketë pasoja”, theksoi Abodi.
Deklaratat e tij lënë të kuptohet se përgjegjësitë mund të shtrihen përtej individëve të përfshirë drejtpërdrejt, duke përfshirë edhe struktura brenda institucioneve të futbollit italian.
Lini një Përgjigje