FLASH
Shkruar nga Pamfleti
Mbrojtësi i Dinamos dhe i Kombëtares, Naser Aliji, foli në emisionin “Kubi Sportiv” për fitoren 2-0 ndaj Tiranës në çerekfinalet e Kupës së Shqipërisë, për objektivat në kampionat dhe për ndeshjen e “play-off”-it të Botërorit 2026 kundër Polonisë.
Aliji e lidhi fitoren me rikthimin e tij pas dëmtimit dhe me punën e trajnerit Ilir Daja.
“Jam i lumtur që u ktheva në fushë pas një periudhe të vështirë dhe që fituam. Kjo ndeshje tregon se po luajmë me më shumë vetëbesim. Titulli kampion mbetet dëshira kryesore, por Kupa ka po aq rëndësi. Trajneri Daja kërkon maksimalen çdo ditë. Analizat e tij janë të gjata dhe intensive dhe na ndihmojnë të përgatitemi për çdo ndeshje. Fryma në ekip na bën të fortë”, deklaroi Aliji.
Dinamo siguroi avantazh me rezultatin 2-0 ndaj Tiranës dhe synon kalimin në gjysmëfinale të Kupës, ndërsa në kampionat mbetet në garë për titullin.
Aliji foli edhe për rolin e tij në skuadër dhe raportin me lojtarët e rinj.
“Shpresoj të ndihmoj lojtarët e rinj dhe të ecim sa më lart bashkë. Pika më e fortë e Dinamos është bashkëpunimi. Jemi bashkë dhe kjo ndikon në rezultate”, u shpreh ai.
Për Kombëtaren, Aliji komentoi ndeshjen e “play-off”-it të Botërorit 2026 ndaj Polonisë, duke e cilësuar përballje me shkallë të lartë vështirësie.
“Është një ndeshje e vështirë, por jo e pamundur. Shqipëria ka ekip të mirë dhe do të japim maksimumin”, deklaroi mbrojtësi.
Ai vlerësoi punën e trajnerit Silvinjo dhe organizimin e skuadrës kombëtare.
“Trajneri Silvinjo është i përkushtuar. Çdo lojtar ka vendin e vet dhe jep maksimumin. Pika më e fortë e Kombëtares është fryma e grupit dhe bashkëpunimi i përditshëm”, tha Aliji.
Në fund, ai kujtoi dy ndeshje që, sipas tij, mbeten referencë në historinë e Kombëtares: fitoren ndaj Armenisë që siguroi kualifikimin historik dhe suksesin ndaj Serbisë.
“Këto momente mbeten në histori. Fitorja me Serbinë erdhi pas asaj me Armeninë dhe na dha motivim për të vazhduar punën me Kombëtaren”, përfundoi Aliji.
Lini një Përgjigje