FLASH
Shkruar nga Pamfleti
Presidenti i Federatës Shqiptare të Futbollit, Armand Duka, ka reaguar pas shortit që e renditi Shqipërinë në Grupin C1 të Ligës së Kombeve. Në një prononcim për faqen zyrtare të FSHF-së, nga Brukseli ku u zhvillua ceremonia, Duka theksoi se vlerësimet mbi shortin mbeten relative, pasi sipas tij, rezultatet përcaktohen në fushë.
“Nuk fitohet në letër”
Duka u shpreh se nuk i konsideron shortet si faktor vendimtar për suksesin në një kompeticion.
“Ndeshjet dhe kompeticionet fitohen në fushë, jo në short apo në letër. Ka raste kur mendon se shorti është i pafavorshëm dhe në fund renditesh më mirë, dhe anasjelltas,” deklaroi ai.
Sipas tij, ndarja e skuadrave në vazo krijon një baraspeshë sportive, duke e bërë të vështirë etiketimin e shortit si të favorshëm apo të pafavorshëm. Megjithatë, ai vlerësoi si pozitive faktin që Shqipëria nuk do të përballet me udhëtime shumë të gjata.
Në mënyrë specifike, Duka përmendi edhe kushtet klimatike në Finlandë, duke shprehur dëshirën që ndeshja atje të mos zhvillohet në muajin nëntor për shkak të temperaturave të ulëta.
Fokusi kryesor: “play-off”-i i marsit
Pavarësisht rëndësisë së Nations League, presidenti i FSHF-së theksoi se përqendrimi aktual i kombëtares mbetet te ndeshjet e play-off-it në muajin mars, të cilat mund t’i sigurojnë Shqipërisë një biletë për në Kupën e Botës 2026.
“Për ne dhe për të gjithë shqiptarët sot përqendrimi kryesor janë ndeshjet e marsit. Uroj që të kemi sukses dhe të bëjmë gjithçka mirë për të arritur objektivin,” u shpreh Duka.
Vetëm pas përfundimit të këtyre sfidave, sipas tij, vëmendja do të zhvendoset plotësisht te Nations League.
Rëndësia e Ligës së Kombeve
Presidenti i FSHF-së nënvizoi se Liga e Kombeve mbetet një kompeticion me peshë, jo vetëm për renditjen dhe mundësinë e ngjitjes në një grup më të lartë, por edhe për shanset shtesë që ofron në rrugën drejt Kampionatit Europian.
Nga ky turne, theksoi ai, mund të sigurohet një vend në play-off-et e kualifikueseve të Europianit, çka e rrit rëndësinë strategjike të përgatitjes serioze.
Duka u shpreh optimist se skuadra do të përgatitet në mënyrën më të mirë dhe shprehu dëshirën që kombëtarja të ketë në dispozicion të gjithë futbollistët, përfshirë edhe elementë të rinj, për të përballuar me sukses sfidat e ardhshme.
Lini një Përgjigje