FLASH
Shkruar nga Pamfleti
Karl-Heinz Rumenige ka dalë me një deklaratë të fortë publike, duke shprehur shqetësimin për drejtimin që, sipas tij, po merr futbolli modern. Ish-drejtuesi i Bajernit të Mynihut theksoi se sistemi aktual, veçanërisht në aspektin financiar, ka nevojë për reforma të thella.
“Ne kemi nevojë për reforma, sepse me këtë drejtim që po marrin gjërat, sidomos financiarisht, nuk mund të vazhdojmë më kështu”, u shpreh Rumenige.
Një nga pikat kryesore të deklaratës së tij ishte roli i agjentëve në futbollin bashkëkohor. Sipas Rumeniges, ndikimi i tyre mbi lojtarët ka arritur nivele të papranueshme.
“Po bëhemi gjithnjë e më të varur nga agjentët, ndikimi i të cilëve tek lojtarët është bërë skandaloz. Sot kemi pagesa për agjentët që janë imorale”, deklaroi ai.
Këto komente vijnë në një kohë kur debatet për transparencën financiare dhe rolin e ndërmjetësve në transferimet e lojtarëve janë shtuar në qarqet sportive evropiane.
Rumenige u ndal edhe te rritja e vazhdueshme e pagave të futbollistëve, duke theksuar se shifrat aktuale janë vështirë të justifikueshme për publikun e gjerë.
“Po hyjmë në sfera që askush jashtë futbollit nuk i kupton më. Në një moment, nuk do të jemi më në gjendje t’ua shpjegojmë njerëzve këto shifra”, tha ai.
Deklaratat e tij rihapin diskutimin mbi qëndrueshmërinë financiare të klubeve dhe mbi nevojën për rregulla më të forta që do të garantonin ekuilibër ekonomik në sportin më të ndjekur në botë.
Lini një Përgjigje