FLASH
Shkruar nga Pamfleti
Me Gasperinin në stol dhe me një drejtor të ri sportiv si Masara, në shtëpinë e Romës kanë nisur punën për të ideuar sezonin e ri. Një pikëpyetje më vete është e ardhmja e qendërmbrojtësit kuqezi, Marash Kumbulla, me këtë të fundit që më 30 qershor i përfundon huazimi tek Espanjoli dhe do të rikthehet në kryeqytetin italian.
Kumbulla mbylli një sezon shumë pozitiv në La Liga, titullar absolut, por tani topi i kalon drejtuesve të Romës dhe mbi të gjitha trajnerit Gasperini për të thënë fjalën i fundit. Sipas mediave italiane, verdhekuqtë janë të detyruar të shesin menjëherë, i duhen 10 milionë euro arkëtime për të qenë korrekt me bilancet financiare.
Marash Kumbulla mund të kthehet vërtet te Verona, ku nisi gjithçka. Sipas asaj që shkruajnë mediat, ka patur kontakte midis agjentit të mbrojtësit dhe drejtorit sportiv Shën Soliano.
Klubi i Espanjolit ka paraqitur një ofertë prej 7 milionë eurosh, të cilën Roma (ekipi që zotëron kartonin) megjithatë e konsideroi të pamjaftueshme. Këtu hyn në lojë Verona, e cila ëndërron një rikthim në shtëpi të futbollistit.
“Corriere dello Sport” zbulon se Roma ka përpiluar një listë të shpejtë për lojtarët që janë në shitje, mes tyre është dhe emri i Marash Kumbullës. Qendërmbrojtësi kuqezi mund të largohet, por vlera e tij e kartonit është një pengesë e forte, pasi Roma nuk ka ndërmend ta shesë nën kosto një lojtar që 4 vite më parë i kushtoi afro 26,5 milionë euro.
Espanjoli mbetet në çdo rast një opsion për Kumbullën pasi drejtuesit e ekipit spanjoll janë shumë të kënaqur me rendimentin e tij, por as që bëhet fjalë, të paktën për momentin, që të investojnë para kesh për të blerë Kumbullën, synojnë ta mbajnë në skuadër të paktën edhe për një tjetër vit në formë huazimi.
Megjithatë, asgjë nuk përjashtohet dhe në javët në vazhdim thuhet se drejtuesit e klubeve do të ulen për të diskutuar në lidhje me të ardhmen e mbrojtësit të Kombëtares shqiptare dhe po ashtu ekziston mundësia që të gjendet një gjuhë e përbashkët. Sezoni i shkëlqyer i Kumbullës në Spanjë ka rritur dëshirën e spanjollëve për ta pasur sërish në ekip.
Lini një Përgjigje