FLASH
Shkruar nga Pamfleti
Kosova nuk arrin të hakmerret ndaj Rumanisë. “Dardanët” janë mposhtur në “Fadil Vokrri” me rezultatin e pastër 0-3.
Jo vetëm një rezultat zhgënjyes, por edhe paraqitja la për të dëshiruar për Kosovën, që regjistroi vetëm 1 gjuajtje në portë, kundrejt 8 të miqve.
Mundësinë e parë për gol ‘Dardanët’ e patën me anë të Vedat Muriqit në minutën e nëntë, i cili me kokë gjuajti mbi portën e portierit mysafir Nita. Në minutën e 20 Fisnik Asllani u rrëzua brenda zonës pas një kontakti me mbrojtësin rumun, por gjyqtari vendosi që ndeshja të vazhdonte. Një tjetër rast për gol për Kosovën erdhi në minutën e 31 kur Milot Rashica bëri një goditje të fuqishme, e cila u prit nga portieri rumun.
Rumunët në anën tjetër patën një mundësi të mirë shënimi me anë të Dragus në minutën e 35, por fatmirësisht gjuajtja e tij me kokë u prit me lehtësi nga Aro Muriç. Pikërisht në momentet kur më së paku pritej, Rumania arriti që të kalojë në epërsi prej 1-0 në minutën e 40 me anë të Dennis Man.
Valentin Mihaila ishte shumë afër dyfishimit të epërsisë së mysafirëve, por gjuajtja e tij në minutën e 44 u ndal nga shtylla.
Në pjesën e dytë, muzika nuk ndryshoi. Edhe përtej mbështetjes së tifozërisë, Kosova pësoi golin e dytë pas një penalltie të shkaktuar.
Por, në fund, erdhi dhe goli i tretë nga Rumania që nervozoi edhe tifozërinë, e cila hodhi edhe disa sende në fushë. Në fund Vojvoda u ndëshkua me karton të kuq, duke lënë "dardanët" me 10 lojtarë.
Duelin e radhës Kosova do ta luajë më datën 9 shtator në transfertë ndaj Qipros, ndërsa Rumania do të presë Lituaninë.
Lini një Përgjigje