FLASH
Shkruar nga Pamfleti
Ka mbetur pak kohë nga nisja e Kupës së Botës 2026, turneut më të madh të futbollit të organizuar ndonjëherë. Për herë të parë në histori, kompeticioni do të zhvillohet në tre vende pritëse Shtetet e Bashkuara, Kanada dhe Meksikë duke nisur më 11 qershor.
Ky edicion do të sjellë gjithashtu një format të ri, me 48 kombëtare pjesëmarrëse dhe 104 ndeshje, duke e bërë Botërorin më të zgjeruar ndonjëherë.
Megjithatë, krahas pritshmërive të larta sportive dhe fitimeve rekord, turneu po shoqërohet me polemika të shumta. Tifozët kanë shprehur pakënaqësi për kostot e larta të pjesëmarrjes, duke përfshirë çmimet e biletave, shpenzimet e udhëtimit dhe akomodimit në vendet organizatore.
Mes shqetësimeve kryesore renditen edhe çështjet e sigurisë, kushtet ekstreme të motit, tensionet gjeopolitike dhe ndikimi që mund të ketë presidenti amerikan Donald Trump gjatë zhvillimit të turneut.
Një situatë e paprecedentë lidhet me faktin se vendi pritës, SHBA-ja, ndodhet në konflikt me një nga kombëtaret pjesëmarrëse, Iranin. Sipas raportimeve, disa anëtarëve të ekipit iranian u janë refuzuar vizat amerikane, ndërsa baza e tyre është zhvendosur nga Arizona në Meksikë. Madje, një zyrtar ka deklaruar se kombëtarja iraniane do të lejohet të hyjë në territorin amerikan vetëm ditën e ndeshjes dhe më pas do të rikthehet në Meksikë.
Ndërkohë, FIFA pritet të arkëtojë të ardhura rekord prej rreth 9 miliardë dollarësh nga ky Botëror, ndërsa 2.7 miliardë dollarë do t’u shpërndahen federatave anëtare gjatë katër viteve të ardhshme. Megjithatë, mënyra e gjenerimit të këtyre të ardhurave ka ngjallur kritika dhe debate.
Një nga çështjet më të diskutuara mbetet ajo e biletave. Në vitin 2018 u deklarua se bileta më e shtrenjtë për finalen do të kushtonte deri në 1.550 dollarë, por kur dolën në shitje çmimi arriti në 8.680 dollarë. Kjo situatë ka nxitur autoritetet në New York dhe New Jersey të nisin hetime ndaj FIFA-s për atë që cilësohet si “fryrje artificiale e çmimeve” dhe “mashtrim i tifozëve” në procesin e shitjes së biletave.
FIFA është përballur gjithashtu me kundërshtimin e shoqatave të tifozëve pasi fillimisht vendosi të ndalonte futjen e shisheve të ujit në stadiume. Vendimi u tërhoq pas reagimeve të forta dhe shqetësimeve për temperaturat e larta që pritet të shoqërojnë ndeshjet.
Në planin mjedisor, ekspertët paralajmërojnë se ky mund të jetë Botërori me ndikimin më të madh negativ ndaj klimës. Zgjerimi i turneut dhe rritja e numrit të udhëtimeve pritet të shtojnë ndjeshëm emetimet e karbonit, ku transporti ajror përbën pjesën më të madhe të gjurmës mjedisore të kompeticionit.
Një tjetër faktor që mund të ndikojë në zhvillimin e ndeshjeve janë kushtet atmosferike. Rrufetë konsiderohen një rrezik serioz në SHBA, ku rregulloret kërkojnë ndërprerjen e ndeshjeve për 30 minuta nëse ato regjistrohen brenda një rrezeje prej 13 kilometrash nga stadiumi. Nëse gjatë kësaj periudhe ndodh një tjetër goditje rrufeje, afati nis nga e para, çka mund të sjellë vonesa të konsiderueshme, siç ndodhi edhe gjatë Botërorit të Klubeve.
Lini një Përgjigje