FLASH
Shkruar nga Pamfleti
Denni Xhepa e ka mbyllur garimin në disiplinën e slalomit gjigant në Skitë Alpine në Lojërat Olimpike Dimërore “Milano Cortina”, duke u renditur në vendin e 34-t mes 81 skiatorëve pjesëmarrës.
Skiatori 22-vjeçar shqiptar, i cili po merr pjesë për herë të dytë në Lojërat Olimpike Dimërore, regjistroi kohën e përgjithshme 2 minuta, 35 sekonda e 91 të qindtat.
Dy zbritje me ritme të ndryshme
Në zbritjen e parë, Xhepa ndaloi kronometrin në 1 minutë, 20 sekonda e 57 të qindtat, kohë që e renditi të 36-in. Sipas të dhënave zyrtare, ai hasi vështirësi në disa pjesë të pistës, çka ndikoi në performancën fillestare.
Në zbritjen e dytë, 22-vjeçari përmirësoi ndjeshëm kohën, duke regjistruar 1 minutë, 15 sekonda e 34 të qindtat. Ky rezultat i lejoi të ngjitej dy pozicione në renditjen përfundimtare, duke e mbyllur garën me kohën totale 2:35.91.
Surpriza e garës dhe podiumi
Sa i përket podiumit, braziliani Lukas Pinheiro Braten surprizoi duke fituar medaljen e artë me kohën 2 minuta e 25 sekonda, duke i dhuruar Brazilit medaljen e parë olimpike të artë në këtë disiplinë.
Favoriti kryesor, Marko Odermat, u rendit i dyti, 58 të qindtat pas fituesit, ndërsa medaljen e bronztë e siguroi Loïk Meilard.
Në pritje të garave të radhës
Denni Xhepa do të rikthehet në pistë më 16 shkurt, ku do të garojë në disiplinën e slalomit.
Ndërkohë, e diela do t’i kushtohet garës së vajzave në slalomin gjigant. Vëmendja kryesore pritet të jetë te Lara Kolturi, e cila sipas renditjes së përgjithshme ndodhet në dhjetëshen më të mirë në botë.
Lini një Përgjigje