FLASH
Shkruar nga Pamfleti
Trabzonspori duket se po vazhdon strategjinë për të afruar futbolistë shqiptarë në skuadër. Pas paraqitjeve të mira të Ernest Muçit, klubi turk ka rikthyer në fokus edhe emrin e Myrto Uzunit.
Sipas raportimeve të mediave turke, mes tyre edhe “HaberGo”, drejtuesit e Trabzonsporit mbeten të interesuar për transferimin e sulmuesit shqiptar, edhe pse një marrëveshje e mundshme mes palëve dështoi gjatë merkatos së janarit.
Vetë Uzuni ka zbuluar më herët se transferimi drejt klubit turk kishte qenë shumë pranë finalizimit, por negociatat u ndërprenë në momentet e fundit.
“Kisha një ofertë shumë të mirë nga Trabzonspori dhe mund të bashkohesha me Ernest Muçin aty. Ishte i mbyllur si transferim, por gjithçka u prish për dhjetë minuta. Trajneri donte shumë të më merrte në ekip, të gjithë ishin dakord dhe oferta ishte e lartë. Ishte njësoj sa ekipi i Austin më bleu te Granada (12 mln euro)”, është shprehur Uzuni në një prononcim për “FSHF”.
Sulmuesi shqiptar aktualisht është pjesë e Austin FC në MLS, ndërsa kontrata e tij me klubin amerikan është e vlefshme deri në fund të vitit 2027. Kjo situatë bën që edhe drejtuesit e Austin të mbajnë qëndrim të kujdesshëm ndaj çdo oferte të mundshme.
Paraqitjet pozitive të Uzunit gjatë këtij sezoni kanë shtuar interesimin e Trabzonsporit, që e sheh 29-vjeçarin si një alternativë të rëndësishme për repartin ofensiv në sezonin e ardhshëm.
Një transferim i mundshëm në Turqi do të konsiderohej një hap i rëndësishëm në karrierën e futbollistit shqiptar, sidomos duke pasur parasysh se Trabzonspori do të jetë pjesë e garave europiane në edicionin e ardhshëm.
Lini një Përgjigje