FLASH
Shkruar nga Pamfleti
Dan Bërn është shembulli perfekt që tregon se nuk është kurrë vonë për të marrë një thirrje në kombëtare. Mbrojtësi i Njukasëllit, i cili në maj do të mbushë 33-vjeç, është ftuar për herë të parë në karrierën e tij me kombëtaren e Anglisë nga trajneri Tomas Tuhel. Një histori unike për këtë lojtar, të cilit i mungon një gisht, si pasojë e një aksidenti që i ka ndodhur në moshë të vogël.
Dan Bërn, ftesa e parë në kombëtare gati në moshën 33-vjeçare
Mbetet për t’u imagjinuar se çfarë ka ndjerë Dan Bërn kur, pas një karriere të ndërtuar hap pas hapi, mori ftesën për të veshur fanelën e “Tre Luanëve”. Nga Darlingtoni te Fulhami, Jeovil Taun, Birmingami, Uigani, Brajtoni dhe në fund Njukasëlli, ai ka qenë gjithmonë një mbrojtës i fuqishëm, që garanton siguri në prapavijë. Trajneri Tomas Tuhel foli për vendimin e tij për ta përfshirë në skuadrën angleze: “Ka pasur një karrierë vërtetë mbresëlënëse dhe është një lojtar shumë i qendrueshëm”.
Pse Dan Bërn i mungon një gisht në dorë
Bërn nuk e ka gishtin e katërt (unazorin) në dorën e djathtë, pas një aksidenti që pësoi në moshën 13-vjeçare. Gjatë një tentative për të kapërcyer gardhin, ai mbante një unazë në gisht, e cila mbeti e kapur në një gozhdë. Për fat të keq, kjo çoi në një prerje të pastër të gishtit. Një histori e trishtë për të cilën Bërn nuk ka folur kurrë publikisht.
Megjithatë, vitet kanë kaluar dhe ai e ka pranuar këtë ngjarje si pjesë të jetës së tij. Madje, në vitin 2024, gjatë një vizite para-sezonale në selinë qendrore të Adidas, ai dhe shokët e tij të ekipit bënë shaka për gishtin e munguar. Të gjithë lojtarët u detyruan të mbanin doreza për të prekur produktet, por hapësira bosh në dorën e Bërn shkaktoi të qeshura mes futbollistëve të Njukasëllit. Sot, megjithatë, ai ka një arsye edhe më të madhe për të buzëqeshur: ftesa në kombëtare, një moment kulmor në karrierën e tij.
Lini një Përgjigje