FLASH
Shkruar nga Pamfleti
Këtë të martë u publikua lajmi se Gjykata e Barcelonës pranoi të lirojë futbollistin brazilian, Dani Alvesh me garancinë pasurore prej një milion eurosh, ndërsa është regjistruar apelimi ndaj dënimit të tij me 4 vite e gjysmë burg nga shkalla e parë për përdhunimin e një të reje në një klub nate.
Në këtë mënyrë, braziliani do të mund të largohet nga burgu “Brians 2”, ku është i burgosur që prej 20 janarit 2023, sapo të depozitojë një milion euro dhe të dorëzojë dy pasaportat (braziliane dhe spanjolle).
Për ta bërë këtë, njerëzit e ish-mbrojtësit të Barcelonës janë mbështetur te Nejmari, ish-bashkëlojtari i tij te Blaugranët, PSG dhe kombëtarja braziliane.
Sipas “La Vanguardia”, babai i Nejmarit do të jetë ai që do të paguajë shumën e lirimit me kusht të Dani Alvesh.
Këtë e kanë konfirmuar për gazetën katalanase burime pranë ish-futbollistit.
Nejmar ka qenë mik i Dani Alvesh që kur u takuan në Barcelonë dhe, nëpërmjet babait të tij do të paguajë garancinë prej një milion eurosh, pasi Alvesh i ka të ngrira llogaritë.
Dani Alvesh tashmë i është drejtuar Nejmarit dhe babait të tij për të paguar 150 mijë eurot që gjykata hetuese kërkoi për dëmshpërblimin e viktimës së sulmit seksual dhe që shërbeu si rrethanë lehtësuese për uljen e dënimit në 4 vite e gjysmë.
Babai i Nejmarit ishte përgjegjës për transferimin e parave për ta ndihmuar palën mbrojtëse të Dani Alvesh.
Lini një Përgjigje