FLASH
Shkruar nga Pamfleti
Egnatia ka siguruar një rezultat pozitiv në ndeshjen e parë të raundit të parë eliminator të Champions League, duke barazuar 1-1 në transfertë ndaj Petroçubit. Kampionët e Shqipërisë rezistuan me një lojtar më pak për më shumë se një pjesë loje, duke e lënë të hapur garën për kualifikim, që do të vendoset në sfidën e kthimit në Rrogozhinë.
Takimi, i zhvilluar në stadiumin "Zimbru", nisi në mënyrën më të pafavorshme për skuadrën rrogozhinase. Vetëm pak sekonda pas fishkëllimës së parë, një gabim në prapavijë u shfrytëzua nga Popesku, i cili përfitoi nga një pasim i gabuar i Aleksit drejt portierit Dajsinani dhe dërgoi topin në rrjetë, duke i dhënë avantazhin vendasve.
Pavarësisht golit të shpejtë të pësuar, Egnatia reagoi dhe mori kontrollin e lojës në kërkim të barazimit. Përpjekjet e skuadrës shqiptare u shpërblyen në minutën e 35-të, kur pas një aksioni të ndërtuar mirë mes Haimes dhe Kryeziut, ishte ky i fundit që finalizoi me saktësi, duke rikthyer ekuilibrin në rezultat.
Në minutat e fundit të pjesës së parë, situata u vështirësua për Egnatian. Kapiteni Aleksi u ndëshkua fillimisht me karton të verdhë për një ndërhyrje në mesfushë, por pas rishikimit të episodit me sistemin VAR, arbitri e ndryshoi vendimin dhe e përjashtoi me karton të kuq, duke e lënë skuadrën shqiptare me dhjetë lojtarë.
Në pjesën e dytë, Petroçubi ushtroi presion të vazhdueshëm dhe krijoi disa raste të rrezikshme për gol. Megjithatë, portieri Dajsinani ishte vendimtar me pritjet e tij, duke mbajtur të paprekur rezultatin. Edhe Egnatia pati mundësi për të goditur në kundërsulm, por nuk arriti t'i konkretizonte rastet e krijuara.
Ndeshja u mbyll në barazim 1-1, një rezultat që konsiderohet i favorshëm për kampionët e Shqipërisë, duke marrë parasysh rrjedhën e takimit dhe inferioritetin numerik. Tashmë gjithçka do të vendoset në ndeshjen e kthimit në Rrogozhinë, ku Egnatia do të synojë të shfrytëzojë faktorin fushë për të siguruar kualifikimin në raundin e dytë eliminator të Champions League.
Lini një Përgjigje