FLASH
Shkruar nga Pamfleti
Pritjes së tifozëve për të mësuar se cilët do të jenë lojtarët e grumbulluar nga Silvinjo për në "EURO 2024” do të marrë fund ditën e nesërme. Në orën 16:00 do të shpallet lista e të grumbulluarve nga braziliani, por tashmë është mësuar lojtari i parë që ka marrë zyrtarisht ftesën nga timonieri i kuqezinjve.
Bëhet fjalë për Ernest Muçin. Ish-sulmuesi i Tiranës do të jetë pjesë e kombëtares shqiptare. Është Beshiktashi që ka zbuluar diçka të tillë, teksa në faqen zyrtare të klubit ka bërë të ditur të gjithë futbollistët që kanë marrë ftesë nga kombëtare e tyre.
Kështu në këtë listë është edhe emri i yllit të kombëtares, me klubin turk që zbulon para kohe ftesën e Silvinjos.
Kujtojmë se kombëtarja do të luajë dy ndeshhje miqësore në fillim të muajit qershor, para startit të "EURO 2024”. Fillimisht do të duelojë me Lihtenshtejnin më 3 qershor dhe 4 ditë më vonë do të sfidohet nga Azerbajxhiani.
Ndërkohë në "EURO 2024”, kundërshtarët e Shqipërisë në grupin B janë Italia, Kroacia dhe Spanja. Më 15 qershor kuqezinjtë do të debutojnë në Gjermani ndaj kombëtares “Axurre”.
Lini një Përgjigje