FLASH
Shkruar nga Pamfleti
Mbrëmja e sotme sjell një nga ndeshjet më interesante të fazës së grupeve të Kupës së Botës 2026, me Francën dhe Norvegjinë që përballen në sfidën e fundit të Grupit I. Të dyja kombëtaret e kanë siguruar tashmë kualifikimin për në fazën me eliminim direkt, ndaj ndeshja do të vendosë vetëm renditjen në krye të grupit. Megjithatë, vëmendja kryesore do të jetë te përballja mes Kylian Mbappé dhe Erling Haaland.
Dy yjet e futbollit botëror ndajnë aktualisht vendin e parë në garën për “Këpucën e Artë”, me nga katër gola të shënuar secili në dy ndeshjet e para të turneut. Për këtë arsye, dueli mes Francës dhe Norvegjisë merr një tjetër dimension, me të dy sulmuesit që synojnë të shkëputen në renditjen e golashënuesve dhe të forcojnë kandidaturën edhe për “Topin e Artë” të kompeticionit.
Mbappé dhe Haaland janë përballur disa herë në nivel klubesh, por kjo do të jetë hera e parë që ndeshen me fanellat e kombëtareve respektive. Rrugëtimi i tyre drejt elitës së futbollit ka qenë i ndryshëm. Haaland, 25 vjeç, po merr pjesë për herë të parë në një Botëror dhe po e shijon këtë eksperiencë me entuziazmin e një debutuesi. Në krahun tjetër, Mbappé, 27 vjeç, po luan Kupën e tij të tretë të Botës dhe konsiderohet tashmë një veteran i këtij turneu.
Francezi numëron 16 gola në 16 ndeshje të Botërorit, duke u renditur pas vetëm Lionel Messit në këtë statistikë. Ai fitoi trofeun në vitin 2018 dhe ishte finalist në edicionin e vitit 2022. Ndërkohë, Haaland ka në palmares një Ligë Kampionesh të fituar me Manchester City në sezonin 2022/23.
Edhe pse të dy janë ndër sulmuesit më të mirë të momentit, karakteristikat e tyre në fushë janë të ndryshme. Mbappé spikat për shpejtësinë, aftësinë për të krijuar hapësira, paparashikueshmërinë dhe efikasitetin si në finalizim ashtu edhe në ndërtimin e aksioneve. Haaland, nga ana tjetër, është një “grabitqar” i zonës, i fuqishëm fizikisht, i drejtpërdrejtë dhe me një instinkt të jashtëzakonshëm për golin. Pavarësisht stileve të ndryshme, të dy konsiderohen ndër golashënuesit më produktivë të futbollit botëror.
Statistikat me kombëtaret janë gjithashtu mbresëlënëse. Mbappé ka realizuar 60 gola me Francën në 100 ndeshje, ndërsa Haaland ka shënuar 59 gola me Norvegjinë në vetëm 52 takime.
Në nivel klubesh, Mbappé është shpallur tetë herë golashënuesi më i mirë i kampionatit, gjashtë herë me PSG në Ligue 1 dhe dy herë me Real Madridin në La Liga. Haaland, ndërkohë, ka fituar tre herë “Këpucën e Artë” të Premier League në katër sezonet e fundit.
Të dy kanë qenë gjithashtu golashënuesit më të mirë të Ligës së Kampioneve në nga dy raste. Mbappé e arriti këtë me PSG në sezonin 2023/24, së bashku me Harry Kane, si dhe me Real Madridin në sezonin e fundit. Haaland u shpall golashënuesi më i mirë me Borussia Dortmund në sezonin 2020/21 dhe me Manchester City në sezonin 2022/23, kur fitoi edhe trofeun.
Në përballjet direkte në nivel klubesh, Mbappé ka epërsinë me tri fitore në katër ndeshje, ndërsa Haaland ka triumfuar vetëm një herë.
Edhe forma e tyre aktuale është mbresëlënëse. Mbappé e mbylli sezonin me 42 gola në të gjitha kompeticionet me Real Madridin, ndërsa Haaland realizoi 38 gola me Manchester City. Me kombëtaret, norvegjezi ka shënuar 16 gola në tetë ndeshjet e fundit, ndërsa francezi ka realizuar 10 gola në 10 sfidat e fundit me “Blutë”.
Të gjitha këto elemente e bëjnë Francë-Norvegji një nga sfidat më tërheqëse të kësaj faze të Botërorit, me Mbappé dhe Haaland që pritet të dhurojnë një duel spektakolar mes dy prej goleadorëve më të mirë të futbollit modern.
Lini një Përgjigje