FLASH
Shkruar nga Pamfleti
Direkt pas barazimit ndaj Çelsit, Arsenali ka shënuar fitore me rezultat 2-0 në shtëpi ndaj Brentfordit në kuadër të javës së 14. Vetëm pas 11 minutash lojë, Mikel Merino hapi rezultatin me një goditje të saktë me kokë, duke u ngritur mbi mbrojtjen pas një krosimi perfekt nga Ben Uajt dhe duke realizuar për 1-0.
Brentfordi iu afrua barazimit në minutën e 21, kur Kevin Shejd goditi bukur me kokë pas një pasimi të lartë preciz, por David Raja reagoi në mënyrë fantastike, duke e devijuar topin në traversë dhe duke e larguar rrezikun.
Në fund të pjesës së parë, Arsenali u detyrua të bënte një ndërrim të detyruar, pasi Kristhian Moskuera u largua i dëmtuar dhe vendin e tij e mori Jurrien Timber. Pjesa e dytë nisi me ritëm të lartë, dhe në minutën e 69, Merino pati mundësinë e artë për të dyfishuar rezultatin. Mesfushori spanjoll duhej vetëm të devijonte topin drejt portës nga shumë pranë, por gjuajtja e tij shkoi jashtë dhe Brentfordi u shpëtua.
Pavarësisht përpjekjeve të Brentfordit, Arsenali arriti të menaxhonte mjaft mirë epërsinë madje duke realizuar edhe golin e dytë në minutën e 91 me Bukajo Saka për 2-0. Me këtë fitore ‘Topçinjtë’ shkojnë në kuotën e 33 pikëve dhe udhëheqin tabelën me pesë pikë më shumë se Mançester Siti.
Lini një Përgjigje