FLASH
Shkruar nga Pamfleti
Kombëtarja shqiptare U-19 është mposhtur me rezultatin 2-1 nga Luksemburgu U-19 në ndeshjen e vlefshme për raundin e parë të Ligës B në kualifikueset e Kampionatit Europian. Takimi u zhvillua në “Shtëpinë e Futbollit”, ku kuqezinjtë nuk arritën të shmangnin një humbje që konsiderohet zhgënjyese për objektivat e ekipit.
Të tre golat e sfidës u shënuan gjatë pjesës së parë. Luksemburgu kaloi fillimisht në avantazh me Kadamin, ndërsa Da Silva dyfishoi shifrat, duke i dhënë një epërsi të rëndësishme skuadrës mike.
Shqipëria reagoi në fundin e pjesës së parë me golin e Arman Durmishit, duke rikthyer përkohësisht shpresat për një rezultat pozitiv. Megjithatë, në pjesën e dytë, skuadra e drejtuar nga trajneri Fatjon Tafaj nuk arriti të gjente golin e barazimit, duke u larguar nga fusha pa pikë.
Në ndeshjen tjetër të grupit, Norvegjia mposhti Maltën me rezultatin minimal 1-0. Me këtë rezultat, rruga drejt kualifikimit bëhet më e vështirë për Shqipërinë, pasi vetëm skuadra e vendit të parë siguron kalimin në fazën tjetër.
Lini një Përgjigje