FLASH
Shkruar nga Pamfleti
Vjosa Osmani pranon hapur se do të kërkojë të qëndrojë edhe për 5 vite si presidente e Kosovës
Me përfundimin e zgjedhjeve të parakohshme parlamentare në Kosovë, vëmendja politike po zhvendoset drejt një çështjeje të nxehtë: kush do të jetë Presidenti i ri i vendit?
Presidentja aktuale, Vjosa Osmani, ka konfirmuar zyrtarisht synimin për të kandiduar për një mandat të dytë, duke hapur kështu garën për postin më të lartë institucional në vend.
Në një intervistë për Radion Evropa e Lirë, Osmani deklaroi se do të zhvillojë konsultime me akterë politikë për të siguruar mbështetjen e nevojshme parlamentare, ndërsa shprehu bindjen se puna e saj e deritanishme përbën bazë të fortë për vazhdimësinë.
“Synoj që të vazhdoj punët e mira për qytetarët e Republikës së Kosovës, për vendin tonë. Mendoj që arritjet e shumta dhe punët e mira që po na presin dhe janë tek dera, duhet të vazhdohen sepse është interesi më i mirë i Republikës sonë. Megjithatë, unë po ashtu jam plotësisht e vetëdijshme që kjo nuk varet vetëm nga ky vlerësim, por varet nga dy të tretat e deputetëve të Republikës së Kosovës, të cilët duhet të vendosin, do të thoja, në dy pika themelore. E para është në qoftë se duan ta mbrojnë interesin më të mirë të Republikës, dhe e dyta, në qoftë se duan ta dëgjojnë vullnetin qytetar”, tha ajo.
Sipas Kushtetutës së Kosovës, presidenti zgjidhet nga Kuvendi me shumicë prej dy të tretash, çka e bën këtë proces një provë serioze për kohezionin ndërpartiak. Vjosa Osmani pritet të kërkojë mbështetje përtej partisë së saj, përfshirë edhe koalicionet e reja që do të formohen pas certifikimit të rezultateve të zgjedhjeve të 28 dhjetorit.
Në intervistën e saj, Osmani ka lënë të hapur angazhimin politik edhe në rast se nuk rizgjidhet presidente, duke nënvizuar se do të vazhdojë të kontribuojë në politikë dhe shërbim publik. Kjo e pozicionon atë si një figurë me ambicie afatgjata në skenën politike kosovare, pavarësisht rezultatit të garës presidenciale.
Në mesazhin e saj publik, Osmani theksoi se prioritet i saj mbetet ruajtja e stabilitetit të Kosovës dhe avancimi i saj në arenën ndërkombëtare. Ajo u ndal te dialogu me Serbinë, marrëveshjet e nënshkruara dhe nevoja për implementim të tyre në mënyrë që Kosova të forcojë pozicionin e saj diplomatik. Gjithashtu, ajo komentoi edhe raportet me SHBA-në, veçanërisht në kushtet e një administrate të re amerikane nën drejtimin e Donald Trump.
Në prag të fillimit të mandatit të ri qeverisës, përballja për postin e presidentit pritet të jetë një nga sfidat kyçe për stabilitetin institucional në Kosovë. Synimi i Osmanit për të ruajtur postin do të varet jo vetëm nga bilanci i saj politik, por edhe nga aritmetika parlamentare dhe marrëveshjet e reja politike që do të lindin pas zgjedhjeve. Etapa e re sapo ka nisur.
Lini një Përgjigje