FLASH
Shkruar nga Pamfleti
“Çështja nuk është një kandidim individual, por mbrojtja e standardeve demokratike, pluralizmit të brendshëm dhe kredibilitetit institucional të partisë më të madhe opozitare në Shqipëri”
Ervin Salianji, i cili nuk u lejua të kandidojë për kreun e Partisë Demokratike në zgjedhjen e 23 majit, ku garon i vetëm Sali Berisha, ka informuar Partinë Popullore Europiane (EPP) lidhur me situatën në PD dhe mënyrën se si Sali Berisha po mban peng këtë forcë politike.
Ne letrën drejtuar Presidentit të PPE-së, Manfred Weber, si dhe drejtuesve të partive kryesore të qendrës së djathtë europiane pjesë e PPE-së, mes tyre Kancelarit të Gjermanisë Friedrich Merz dhe Kryeministrit të Greqisë Kyriakos Mitsotakis, Salianji shpreh shqetësimin lidhur me zhvillimet e fundit në Partinë Demokratike të Shqipërisë dhe shkeljen e standardeve demokratike të funksionimit të saj.
Salianji ngre shqetësimin për bllokimin e garës për kryetar të Partisë Demokratike, mosrespektimin e statutit të partisë, përjashtimet arbitrare të anëtarëve dhe kandidatëve, mungesën e transparencës dhe shkeljen e rregullave themelore të pluralizmit politik.
“Çështja nuk është një kandidim individual, por mbrojtja e standardeve demokratike, pluralizmit të brendshëm dhe kredibilitetit institucional të partisë më të madhe opozitare në Shqipëri”, shprehet Salianji në letrën e tij.
Në vijim, ai thekson se Partia Demokratike, si pjesë e familjes politike europiane, duhet të jetë model i demokracisë së brendshme dhe jo simbol i mbylljes, përjashtimeve dhe interesave personale. Salianji thekson se në garën për kreun e PD-së, kandidaturat u penguan në mënyrë faktike, ndërsa zyra përgjegjëse për dorëzimin e dokumentacionit nuk funksionoi brenda afatit.
Gjithashtu Salianji thekson se mbështetës dhe kandidatë u përjashtuan pa vendime formale dhe pa argumentim statutor, sikundër nuk u respektua neni i statutit që parashikon dorëheqjen e kryetarit pas humbjes së zgjedhjeve parlamentare.
Salianji kërkon nga PPE dhe drejtuesit e partive të djathta europiane një angazhim parimor dhe konstruktiv për të inkurajuar dialogun, respektimin e normave statutore dhe ruajtjen e standardeve demokratike brenda Partisë Demokratike të Shqipërisë.
"Të marra së bashku, këto zhvillime rrezikojnë të ndikojnë negativisht jo vetëm funksionimin demokratik të brendshëm të Partisë Demokratike të Shqipërisë, por edhe besimin publik tek vlerat demokratike të përfaqësuara nga familja më e gjerë politike europiane.
Në dritën e sa më sipër, ju ftoj me respekt që drejtuesit e PPE-së të konsiderojnë një angazhim parimor dhe konstruktiv lidhur me këtë çështje, me qëllim inkurajimin e dialogut të brendshëm, forcimin e respektimit të normave statutore dhe mbrojtjen e standardeve demokratike brenda partisë", shprehet Salianji.
Letra e Salianjit, ish-deputetit të PD-së, që konsiderohet nga Sali Berisha si i vetëpërjashtuar nga Partia Demokratike, pason atë të Alesia Balliut, e cila nuk u lejua të garojë për kreun e partisë më të madhe opozitare. Balliu iu drejtua Trupit Diplomatik në Tiranë, por edhe disa prej kancelarive kryesore europiane, lidhur me atë që po ndodh në Partinë Demokratike, ndërsa akuzon Sali Berishën se ka uzurpuar PD-në.
Berisha dhe kupola drejtuese e PD-së e konsideron moslejimin e Salianjit në garën për kreun e PD-së si legjitime, duke e justifikuar përjashtimin si një procedurë që ka lidhje me "shkeljen e vijave të kuqe" nga ish-deputeti. Për Berishën, Salianji ka bashkëpunuar me elementë kriminalë, ndërsa ish-deputeti i ka kthyer "reston" kreut demokrat, duke i kujtuar "non gratat", ku një nga argumentet e përdorura nga Mbretëria e Bashkuar, janë pikërisht lidhjet e tij me krimin e organizuar.
Letra e plotë
Po ju shkruaj me frymën e respektit dhe angazhimit konstruktiv, të udhëhequr nga parimet themelore të sanksionuara në Manifestin e PPE-së: demokracia, shteti i së drejtës, llogaridhënia dhe pluralizmi politik.
Në një kohë kur një brez i tërë në Shqipëri, brenda Partisë Demokratike, po përpiqet të kontribuojë në përfundimin e një tranzicioni të zgjatur dhe në avancimin e integrimit europian, po dëshmojmë përpjekje nga përfaqësues të asaj që perceptohet si “establishmenti i vjetër politik” për të mbyllur hapësirat e brendshme, për t’u tërhequr në interesa personale dhe për t’i rezistuar ndryshimit. Këto prirje rrezikojnë të minojnë si frymën e rinovimit, ashtu edhe rrugën europiane të Shqipërisë.
PPE qëndron në zemër të familjes politike europiane, e bazuar mbi parimet demokratike, lirinë dhe shtetin e së drejtës, të cilat afirmojnë se është qytetari ai që vendos në fund. I rikujtoj këto parime për të theksuar se ekziston një brez në Shqipëri që beson fort tek ato dhe Partia Demokratike, si pjesë e familjes së PPE-së, duhet të përfaqësojë dhe kanalizojë këtë aspiratë për ndryshim.
Këto vlera nuk janë vetëm themeli i identitetit tonë të përbashkët politik, por edhe standardi mbi të cilin duhet të vlerësohet besueshmëria e çdo partie anëtare.
Fatkeqësisht, aktualisht po përballemi me pengesa të brendshme që pamundësojnë ushtrimin e kësaj përgjegjësie përmes mjeteve demokratike. Po ashtu, jemi dëshmitarë të zhvillimeve brenda Partisë Demokratike të Shqipërisë që ngrenë shqetësime serioze lidhur me demokracinë e brendshme dhe respektimin e rregullave statutore.
Shqetësimi im lidhet konkretisht me situatën brenda Partisë Demokratike të Shqipërisë dhe dëshiroj të sjell në vëmendjen tuaj një sërë zhvillimesh të fundit që ngrenë pikëpyetje serioze mbi respektimin e standardeve demokratike të brendshme dhe detyrimeve statutore nën drejtimin aktual të z. Sali Berisha.
Si anëtar i Kryesisë së Partisë, kam udhëhequr një fushatë gjashtëmujore në të gjithë vendin në përgatitje për zgjedhjet për drejtimin e partisë në maj 2026, duke marrë mbështetje të konsiderueshme nga anëtarët e Partisë Demokratike në të gjithë Shqipërinë. Të rinj, profesionistë, intelektualë dhe qytetarë të lirë morën pjesë në takimet e mia.
Mes tyre ekzistonte një ndjenjë e fortë shprese dhe motivimi, pasi ka një dëshirë të përhapur për ndryshim në Shqipëri. Ndryshim që, sipas meje, sipas tyre dhe sipas shumicës dërrmuese të qytetarëve shqiptarë, nuk mund të arrihet pa një rinovim të drejtimit të Partisë Demokratike.
Pavarësisht se plotësoja të gjitha kriteret statutore, u pengova efektivisht të marr pjesë në garën për drejtimin e partisë, pa asnjë justifikim formal apo vendim zyrtar.
E vetmja gjë që kërkuam ishte mundësia për të garuar brenda një procesi demokratik.
Z. Sali Berisha, 82 vjeç, ka drejtuar Partinë Demokratike për 36 vite. Ai duhet të marrë përgjegjësi për humbjet sistemike që kanë kontribuar në dobësimin e Partisë Demokratike të Shqipërisë — si çështje parimore dhe në përputhje me Statutin e Partisë.
Ai është kthyer në simbol të “establishmentit të vjetër politik” dhe, në interes të rinovimit demokratik, duhet të tërhiqet
Shqetësim të veçantë ngre shkelja e hapur e Nenit 46 të Statutit të Partisë, i cili parashikon qartë dorëheqjen e Kryetarit pas humbjes në zgjedhjet e përgjithshme, pa mundësi rikandidimi të menjëhershëm. Moszbatimi i kësaj dispozite ngre shqetësime legjitime lidhur me respektimin e rregullave demokratike të brendshme dhe llogaridhënien institucionale.
Gjithashtu, disa zhvillime të tjera meritojnë vëmendje të kujdesshme dhe të balancuar:
• Përjashtimi ose largimi i mbështetësve të mi nga Partia pa asnjë arsyetim të justifikuar apo transparent;
• Përjashtimi ose largimi i anëtarëve të partisë që thjesht kanë shprehur shqetësime lidhur me llogaridhënien dhe nevojën për reforma të brendshme;
• Mungesa e transparencës lidhur me listat e votuesve dhe standardet demokratike të nevojshme për një proces të drejtë zgjedhor të brendshëm, të kërkuara nga kandidatët, media, OJF-të dhe institucionet;
• Mosmarrja në konsideratë e aplikimeve për kandidim të paraqitura brenda afatit zyrtar të hapur;
• Përjashtimi ose largimi i kandidatëve për zgjedhjet e brendshme të Partisë në të gjithë Shqipërinë pa vendim zyrtar apo arsyetim të justifikuar dhe transparent bazuar në statut.
Veçanërisht shqetësues ishte fakti që, megjithëse drejtuesit e partisë njoftuan hapjen e aplikimeve për kandidatura vetëm 18 orë para afatit përfundimtar, aplikimet nuk u lejuan as të dorëzoheshin formalisht, pasi zyra përgjegjëse qëndroi e mbyllur dhe dokumentacioni nuk u pranua apo shqyrtua.
I nderuar President,
Çështja në fjalë nuk lidhet me një kandidaturë individuale, por me ruajtjen e standardeve demokratike, pluralizmit të brendshëm dhe besueshmërisë institucionale brenda një partie që përfaqëson forcën më të madhe opozitare në Shqipëri dhe është pjesë e familjes së Partisë Popullore Europiane.
Të marra së bashku, këto zhvillime rrezikojnë të ndikojnë negativisht jo vetëm funksionimin demokratik të brendshëm të Partisë Demokratike të Shqipërisë, por edhe besimin publik tek vlerat demokratike të përfaqësuara nga familja më e gjerë politike europiane.
Në dritën e sa më sipër, ju ftoj me respekt që drejtuesit e PPE-së të konsiderojnë një angazhim parimor dhe konstruktiv lidhur me këtë çështje, me qëllim inkurajimin e dialogut të brendshëm, forcimin e respektimit të normave statutore dhe mbrojtjen e standardeve demokratike brenda partisë.
Duke pasur parasysh rëndësinë e këtyre shqetësimeve, do të kërkoja gjithashtu me mirësjellje që ky komunikim t’u përcillet strukturave dhe organeve përkatëse të PPE-së përgjegjëse për demokracinë, qeverisjen politike dhe standardet institucionale.
Më lejoni të riafirmoj angazhimin tim të palëkundur ndaj vlerave themelore të Partisë Popullore Europiane — demokracisë, shtetit të së drejtës, pluralizmit, llogaridhënies dhe integrimit europian — si dhe bindjen time se këto parime duhet të udhëheqin sjelljen politike në çdo nivel. /Pamfleti/
Ti je një i dënuar me Vendim të Formes se prere. Salianj karagjozi, sëbashku me Irafanin, Griden dhe shkopin e bejsbollit, kerkon të garoje për Kryetar i PD. Ti Kar-a-bush, ta ndalon ligji per të marrë detyra dhe poste publike. Duro, pesë viteve që të dalë çertifikata e Penalitetit e paster she konkuro Po të jetë partia gjalle. Sot je as më shumë dhe as më pak një Kar-a-bush!