FLASH
Shkruar nga Pamfleti
Në një intervistë , kryeministri Edi Rama foli për procesin e integrimit europian, marrëveshjen për emigrantët me Italinë dhe polemikat rreth projektit turistik në jug të Shqipërisë…
Kryeministri i Shqipërisë, Edi Rama, deklaroi se procesi i anëtarësimit të vendit në Bashkimin Europian është i pakthyeshëm. Në një intervistë ekskluzive për gazetaren Anna La Rosa të agjencisë italiane Italpress, ai trajtoi edhe marrëveshjen Shqipëri-Itali për emigrantët, si dhe debatet lidhur me projektin turistik në jug të vendit, kundër të cilit proteston lëvizja "Revolucioni i Flamingove".
Duke folur për integrimin europian, Rama u shpreh se asnjë zhvillim nuk mund ta ndalë rrugën e Shqipërisë drejt BE-së.
"Siç thoshte Winston Churchill, një krizë e mirë nuk duhet humbur kurrë. Ka gjithmonë diçka për të mësuar dhe për të reflektuar, por ndërkohë askush nuk mund ta ndalë procesin e Shqipërisë drejt Bashkimit Europian", tha ai.
Lidhur me marrëveshjen për emigrantët mes Italisë dhe Shqipërisë, e cila ka shkaktuar debate politike gjatë muajve të fundit, Rama tha se polemikat kanë qenë të ekzagjeruara.
"Së fundi u bë shumë zhurmë për diçka që ishte thjesht një përpjekje e sinqertë për të gjetur një drejtim dhe zgjidhje. Fakti që sot kjo qasje është pranuar nuk është një fitore, por një tjetër shembull i kohës së humbur në përballje që shpesh nuk kanë qenë beteja të vërteta, por përplasje të panevojshme në arenën publike", deklaroi ai.
Sipas kryeministrit, problemi kryesor mbetet koha që humbet përpara se të arrihet një qëndrim i përbashkët.
Rama komentoi edhe protestat e organizuara nga lëvizja "Revolucioni i Flamingove", e cila kundërshton një projekt resorti në jug të Shqipërisë. Ai hodhi poshtë akuzat ndaj qeverisë dhe tha se ato dëmtojnë imazhin e vendit.
"Prej vitesh jam akuzuar për gjithçka. Nuk e di nëse ka mbetur ende diçka që nuk më është atribuar. Kjo më dhemb, sepse në atë moment nuk bëhet më fjalë vetëm për mua, por për Shqipërinë", u shpreh Rama.
Sipas tij, rreth këtij projekti është ndërtuar një narrativë pa prova.
"Ata që bëjnë akuza duhet të paraqesin prova, jo të kërkojnë që i akuzuari të dëshmojë vazhdimisht pafajësinë. Nëse më akuzojnë se kam dhënë këto toka ose se kam dëmtuar një pjesë të bukur të bregdetit shqiptar, atëherë le të sjellin provat. Deri tani nuk është paraqitur asnjë provë dhe nuk është vërtetuar asgjë. Nuk ka ende marrëveshje të nënshkruar, sepse negociatat nuk kanë përfunduar", tha ai.
Për pjesën tjetër të zhvillimit, që ndodhet në prona private, Rama theksoi se shteti nuk është palë në proces.
"Shteti dhe qeveria nuk kanë lidhje me atë pjesë të projektit. Nuk është dhënë ende leje ndërtimi dhe procedurat janë ende në zhvillim. Kemi arritur në një situatë paradoksale", deklaroi ai.
Megjithatë, kryeministri tha se i kupton arsyet e qytetarëve që protestuan, por kritikoi përpjekjet për ta kthyer çështjen në një debat ndërkombëtar.
"Nëse do të isha mes protestuesve dhe do të dëgjoja vetëm një version të ngjarjes, ndoshta do të ndihesha po aq i indinjuar. Por nëse do të dëgjoja edhe palën tjetër, do të kuptoja se nuk ekzistojnë provat për ato që pretendohen. Fatkeqësisht, sot askush nuk flet më për flamingot. Ato janë bërë simbol për ata që duan ta çojnë këtë çështje në arenën ndërkombëtare. Në nivel vendas kemi të bëjmë me një debat mes grupeve të ndryshme të shoqërisë dhe opozitës, ndërsa jashtë vendit ai paraqitet si një betejë kundër Donald Trump", tha Rama. /Pamfleti/
Lini një Përgjigje