FLASH
Shkruar nga Pamfleti
Deputetja e Partisë Demokratike Albana Vokshi tha se protesta e një dite më parë është më e madhja që opozita ka realizuar ndonjëherë. Vokshi u shpreh se në bazë të përllogaritjeve, dje në bulevard kanë qenë 120 mijë protestues.
“Nuk ka njeri që nuk e ka të qartë që opozita ka mbështetje, ishte përtej pritshmërive për mirë. Kisha besimin e plotë, nga struktura nga daljet në degë që do kishim numra të mëdhenj dhe tentonim të shkonim te një nga protestat më të mëdha, si protesta e 7 korrikut, kjo e djeshme, kishte 25% më shumë, ka pasur më shumë se 120 mijë në shesh”, tha Vokshi për "A2 CNN".
Teksa e cilësoi si protestë të qytetarëve, ajo u shpreh se në Bulevard ka pasur edhe ish-drejtorë të kryebashkiakut Erion Veliaj, teksa thekson se kanë pasur arsye të forta për të protestuar.
“Kemi parë edhe ish-drejtor të Veliaj me familje që i kemi identifikuar, sepse kanë dalë ato që mund të mos i kemi kontaktuar direkt, por mesazhi ynë ka shkuar, dhe kushdo që ka pasur një arsye për të dalë dje ka pasur ditën për të dalë”, vijoi deputetja.
Sipas saj, në protestë u vërtetua që qytetarët e mbështesin opozitën e bashkuar, por edhe aksionin e saj, me protesta brenda dhe jashtë Kuvendit.
“Protesta e djeshme ka vërtetuar që opozita është në këmbë, që është më e fortë, që opozita e bashkuar është e mirëpritur, sepse qytetarët dolën për mesazhin e bashkimit të opozitës, por edhe frontit të opozitës dhe kanë përshëndetur dhe mbështetur dhe aksionin opozitar si brenda dhe jashtë parlamentit, në rrugën e Shpresës”, përfundoi Vokshi.
Lini një Përgjigje