FLASH
Shkruar nga Pamfleti
Si rrallë herë Partia Socialiste dhe Partia Demokratike janë bërë bashkë në Kuvend. Me 114 vota pro, opozita dhe mazhoranca miratuan rezolutën e përbashkët për integrimin në BE.
Projekt-rezoluta e hartuar nga deputetët e Komisionit për Politikën e Jashtme, synon të vendosë prioritetet dhe angazhimet politike të Shqipërisë në rrugën drejt Bashkimit Europian.
Dokumenti e cilëson anëtarësimin në BE si “objektiv strategjik kombëtar” dhe kërkon një angazhim të përbashkët institucional dhe politik për përshpejtimin e negociatave dhe zbatimin e reformave të kërkuara nga Brukseli.
Në projekt-rezolutë, Kuvendi angazhohet të forcojë rolin e tij në procesin e integrimit, duke rritur kontrollin parlamentar ndaj qeverisë, institucioneve të pavarura dhe agjencive shtetërore, si edhe duke garantuar transparencë dhe llogaridhënie më të fortë në procesin e negociatave.
Një nga pikat më domethënëse të dokumentit lidhet me raportin mes mazhorancës dhe opozitës. Socialistët angazhohen të garantojnë pjesëmarrjen e plotë të opozitës në jetën parlamentare dhe respektimin e të drejtave të saj sipas Kushtetutës dhe standardeve demokratike, ndërsa opozita angazhohet të marrë pjesë aktive në veprimtarinë parlamentare. Të dyja palët pranojnë nevojën për forcimin e dialogut politik dhe ndërtimin e konsensusit për prioritetet europiane.
Rezoluta vendos theks të fortë edhe te reforma zgjedhore, ku Kuvendi angazhohet të intensifikojë ritmin e ndryshimeve në përputhje me rekomandimet e OSBE/ODIHR dhe Komisionit të Venecias, me synimin për garantimin e zgjedhjeve të lira dhe të barabarta.
Një tjetër fokus i rëndësishëm është lufta kundër korrupsionit dhe krimit të organizuar. Dokumenti kërkon forcimin e përpjekjeve dhe konsolidimin e rezultateve konkrete në goditjen e korrupsionit të nivelit të lartë, duke garantuar mbështetje të plotë për institucionet ligjzbatuese dhe zbatimin e kërkesave të Bashkimit Europian.
Në projekt-rezolutë përfshihet gjithashtu një angazhim i drejtpërdrejtë për mbrojtjen e lirisë së medias dhe pluralizmit mediatik. Kuvendi kërkon përmirësimin e mekanizmave të mbrojtjes së gazetarëve dhe garantimin e një mjedisi mediatik të lirë, konkurrues dhe profesional.
Dokumenti prek edhe çështjen e dezinformimit dhe ndërhyrjeve të huaja, ku kërkohet monitorim më i fortë për mbrojtjen e proceseve demokratike dhe interesave strategjike të vendit.
Përmes rezolutës, Kuvendi i kërkon gjithashtu qeverisë të raportojë rregullisht për ecurinë e negociatave dhe përmbushjen e kapitujve negociues, si edhe të përshpejtojë reformat në shtetin e së drejtës, administratën publike dhe sistemin gjyqësor.
Një tjetër angazhim lidhet me transparencën financiare dhe përdorimin e fondeve europiane. Qeverisë i kërkohet të përputhë legjislacionin për prokurimet publike me standardet e BE-së, të rrisë konkurrencën dhe transparencën në tendera dhe të garantojë financime të dedikuara për reformat që lidhen me integrimin.
Rezoluta kërkon gjithashtu mbrojtjen e mjedisit dhe zonave të mbrojtura sipas standardeve europiane, forcimin e kapaciteteve të pushtetit vendor dhe rritjen e ndërgjegjësimit publik për procesin e anëtarësimit në Bashkimin Europian.
Në fund të dokumentit, Kuvendi rithekson se integrimi europian duhet të mbetet kursi i pandryshueshëm strategjik i Shqipërisë dhe se përparimi drejt BE-së duhet të matet mbi bazën e meritës, reformave konkrete dhe standardeve demokratike.
Rezoluta
Në zbatim të Kushtetutës së Republikës së Shqipërisë dhe neneve 18 dhe 103/1 të Rregullores së Kuvendit të Shqipërisë;
Në zbatim të nenit 18, pika 1, të Ligjit nr.15/2025 “Për rolin e Kuvendit në procesin e negociatave dhe anëtarësimit të Republikës së Shqipërisë në Bashkimin Europian”, të ndryshuar;
Duke rikonfirmuar se anëtarësimi i Republikës së Shqipërisë në Bashkimin Evropian përbën objektiv strategjik kombëtar, që udhëheq dhe orienton të gjithë agjendën reformuese të vendit për transformimin demokratik, institucional, ekonomik dhe social;
Duke nënvizuar përgjegjësinë kushtetuese të Kuvendit të Shqipërisë për mbikëqyrjen e procesit të integrimit, forcimin e kontrollit parlamentar dhe garantimin e transparencës;
Duke theksuar se orientimi evropian është zgjedhje e vullnetit të lirë, me rëndësi strategjike mbarëkombëtare, që gëzon mbështetje të gjerë qytetare dhe përfaqëson një angazhim të qëndrueshëm ndaj vlerave themelore të Bashkimit Evropian, demokracisë, shtetit të së drejtës, lirisë, paqes dhe bashkëjetesës, barazisë dhe dinjitetit njerëzor;
Duke pasur parasysh kriteret e Kopenhagës dhe parimin se procesi i anëtarësimit bazohet në meritë, kushte të drejta dhe zbatim real të reformave, në përputhje me standardet demokratike dhe respektimin e të drejtave themelore;
Të vetëdijshëm se Shqipëria ka hapur me shpejtësi të gjithë kapitujt e negocimit dhe është në pritje të miratimit të raportit IBAR;
Duke vlerësuar se procesi i zgjerimit të BE-së po zhvillohet në një kontekst gjeopolitik të ndjeshëm që kërkon riformësim të shpejtë të institucioneve dhe përparim të matshëm në fushat kyçe si, funksionimi demokratik i institucioneve, gjyqësori dhe të drejtat themelore, drejtësia, liria dhe siguria, prokurimi publik, kontrolli financiar, statistikat, kriteret ekonomike, dhe reforma në administratën publike;
Duke marrë në konsideratë Raportin e Komisionit Evropian për Shqipërinë 2025 dhe Raportin e Parlamentit Evropian për Shqipërinë, miratuar në 5 maj 2026 në Komisionin për Punët e Jashtme të Parlamentit Evropian (AFET);
Duke mbajtur parasysh gjetjet dhe rekomandimet e Raportit Final të OSBE/ODIHR për zgjedhjet parlamentare të 11 majit 2025;
Duke theksuar rëndësinë e respektimit të lirive dhe të drejtave themelore, si dhe domosdoshmërinë e garantimit të transparencës në procesin e anëtarësimit në Bashkimin Evropian;
Duke theksuar se integrimi evropian kërkon transformim thelbësor, që përfshin harmonizim të ligjeve në përputhje me standardet evropiane, zbatim të plotë të tyre, rezultate konkrete dhe të matshme, përgjegjësi institucionale dhe gjithëpërfshirje;
Duke marrë në konsideratë rëndësinë e besimit të publikut, garantimin e ndarjes reale të pushteteve, garantimin e mekanizmave të kontrollit dhe balancës, pavarësinë e institucioneve kushtetuese dhe dialogun konstruktiv gjithëpërfshirës politik dhe shoqëror si themeli i një demokracie funksionale, kërkesa thelbësore për procesin e anëtarësimit të Republikës së Shqipërisë në Bashkimin Evropian;
Duke shprehur vlerësimin për mbështetjen e vazhdueshme dhe të gjithanshme, strategjike dhe financiare të Bashkimit Evropian për Shqipërinë;
Kuvendi i Shqipërisë angazhohet:
Të forcojë në tërësi dhe në mënyrë të drejtpërdrejtë rolin e tij në përshpejtimin e procesit të anëtarësimit të Republikës së Shqipërisë në Bashkimin Evropian.
Të ushtrojë në mënyrë të plotë dhe efikase funksionin ligjbërës dhe mbikëqyrës për procesin e anëtarësimit në Bashkimin Evropian, duke garantuar cilësinë e legjislacionit, përafrimin me acquis të BE-së dhe zbatimin e tij konkret në praktikë.
Të forcojë kontrollin parlamentar ndaj pushtetit ekzekutiv, institucioneve dhe agjencive të pavarura, duke respektuar parimin kushtetues të ndarjes dhe balancimit mes pushteteve, duke rritur transparencën, auditimin dhe llogaridhënien.
Mazhoranca angazhohet të sigurojë kushtet për pjesëmarrjen e plotë të opozitës në veprimtarinë parlamentare, të respektojë kërkesat e saj në përputhje me standardet demokratike, me Kushtetutën dhe Rregulloren e Kuvendit. Opozita angazhohet të sigurojë pjesëmarrje të plotë në veprimtarinë parlamentare në përputhje me standardet demokratike, me Kushtetutën dhe Rregulloren e Kuvendit. Të dyja palët angazhohen për forcimin e dialogut politik.
Të thellojë angazhimin e përbashkët me qytetarët, grupet e interesit dhe aktorë të tjerë të shoqërisë, me qëllim njohjen dhe gjithëpërfshirjen në procesin e anëtarësimit në Bashkimin Evropian.
Të intensifikojë ritmin e reformës zgjedhore në zbatim të plotë të rekomandimeve të OSBE/ODIHR dhe Komisionit të Venecias, për garantimin e zgjedhjeve të lira e të barabarta.
Të japë mbështetje të plotë për institucionet kushtetuese dhe/ose të krijuara me ligj, duke përfshirë dhe garantimin e zbatimit të vendimeve të tyre ligjore.
Të kërkojë përforcimin e përpjekjeve dhe të konsolidojë rezultatet konkrete në luftën kundër korrupsionit të nivelit të lartë dhe krimit të organizuar, duke garantuar mbështetje të plotë për institucionet përkatëse dhe zbatimin e kërkesave të Bashkimit Evropian.
Të kërkojë respektimin e lirisë së shprehjes, garantimin e pluralizimit mediatik, përmirësimin e mekanizmave të mbrojtjes së gazetarëve dhe gazetarisë së lirë, duke garantuar një mjedis mediatik të lirë, konkurrues dhe profesional.
Të monitorojë luftën kundër dezinformimit dhe ndërhyrjeve të huaja, për mbrojtjen e integritetit të proceseve demokratike dhe të interesave strategjike kombëtare.
Të nxisë dialog politik dhe shoqëror gjithëpërfshirës, për të siguruar konsensus kombëtar mbi prioritetet evropiane.
Të forcojë partneritetin ndërparlamentar me Parlamentin Evropian dhe parlamentet e vendeve anëtare të BE-së, duke kontribuar aktivisht në diplomacinë parlamentare dhe marrëdhëniet dypalëshe me to.
Të refuzojë çdo nismë, akt apo veprim që devijon nga kursi i qenësishëm i anëtarësimit të plotë të Shqipërisë në Bashkimin Evropian.
Kuvendi i Shqipërisë i kërkon Këshillit të Ministrave:
Të raportojë në përputhje me kuadrin ligjor, përfshirë plotësimin e piketave përmbyllëse për të gjithë grupkapitujt negociues dhe konkluzionet e konferencave ndërqeveritare.
Të garantojë zbatim të plotë dhe të qëndrueshëm të legjislacionit në përputhje me acquis të BE-së, duke përshpejtuar reformat në shtetin e së drejtës, luftën kundër korrupsionit dhe krimit të organizuar, gjyqësor dhe fushat e tjera të Grupkapitullit I “Themelorët”.
Të sigurojë sinergjinë mes instrumenteve të ndryshme financiare të Bashkimit Evropian, shteteve anëtare të tij dhe partnerëve ndërkombëtarë për zhvillim, duke raportuar në mënyrë të posaçme në Kuvendin e Shqipërisë lidhur me mbështetjen e partnerëve për zhvillim për procesin e integrimit dhe anëtarësimit në Bashkimin Evropian.
Të garantojë parashikime të dedikuara buxhetore në çdo program buxhetor për zbatimin e reformave kyçe në kuadër të procesit të anëtarësimit, me fokus të veçantë në mbështetjen për institucionet ligjzbatuese.
Të përputhë kuadrin ligjor për prokurimet publike me qëllim forcimin e transparencës dhe konkurrencës në prokurimet publike dhe përdorimin e fondeve të BE-së.
Të përshpejtojë reformën në administratën publike në përputhje me kërkesat e Bashkimit Evropian me qëllim rritjen e efikasitetit të saj dhe të zbatojë me përpikëri kriterin e meritës në rekrutime.
Të mbrojë mjedisin dhe zonat e mbrojtura, në përputhje me standardet e BE-së.
Të sigurojë konsultim gjithëpërfshirës me opozitën, shoqërinë civile dhe grupet e interesit për të garantuar një vendimmarrje me bazë sa më të gjerë.
I kërkon të forcojë më tej kapacitetet e strukturës shtetërore, përgjegjëse për zhvillimin e negociatave dhe lidhjen e Traktatit të Aderimit të Republikës së Shqipërisë në Bashkimin Evropian.
I kërkon që të intensifikojë një fushatë ndërgjegjësuese mbi Bashkimin Evropian dhe standardet evropiane si nxitëse të transformimit evropian në kuadër të procesit të anëtarësimit në Bashkimin Evropian.
I kërkon të mbështesë më tej pushtetin vendor në forcimin e kapaciteteve të tij, për ta përgatitur për anëtarësimin në Bashkimin Evropian.
Kuvendi i Shqipërisë rithekson se përparimi në procesin e anëtarësimit duhet të matet mbi bazën e meritës, standardeve demokratike dhe arritjeve të verifikueshme, me qëllim që Shqipëria të ecë me hapa të qëndrueshëm drejt anëtarësimit të plotë në Bashkimin Evropian.
Lini një Përgjigje