FLASH
Shkruar nga Pamfleti
Partia Socialiste ia bëri të qartë opozitës se nuk do të pranojë ngritjen e dy komisioneve hetimore të kërkuara prej tyre, për çështjen McGonigal dhe zgjedhjet e 11 Majit.
Votimi nuk është marrë ende, por socialistët e pohuan që dy komisionet nuk do të ngrihen dhe kjo bëri që deputetët demokratë, me Sali Berishën në krye të linin sallën.
Në ambientet e jashtme të Kuvendit, Berisha tha për mediat se PS mohoi ngritjen e komisionit për çështjen McGonigal, pasi sipas tij pjesë e dosjes është kryeministri Edi Rama.
Opozita argumentoi se moslejimi i ngritjes së komisioneve hetimore shkel nenin 77 të Kushtetutës, që garanton të drejtën e pakicës parlamentare për të kërkuar hetime mbi çështje të interesit publik.
Në përgjigje të situatës, Grupi Parlamentar i PD-së ka thirrur një mbledhje të posaçme për të premten, më 31 tetor, në orën 12:00, për të diskutuar hapat e mëtejshëm lidhur me mohimin e të drejtave kushtetuese të opozitës. Sipas njoftimit të grupit, kërkohet që të gjithë deputetët të jenë të pranishëm, duke theksuar rëndësinë e mbledhjes.
Në këtë mbledhje me shumë gjasa do të diskutohet plani i ri i veprimit të opozitës dhe nuk përjashtohet mundësia e rikthimt të skenarit të vjetër me protesta dhe 'mosbindje civile'. Eksponentë të ndryshëm në kupolën e PD-së kanë shprehur hapur mundësinë e rikthimit të protestave. Kështu që nga dita e nesërme opozita mund të futet në "stinën e protestave".
Lini një Përgjigje