FLASH
Shkruar nga Pamfleti
Kreu i Partisë së Lirisë, Ilir Meta, ka reaguar ashpër ndaj ish-bashkëpunëtorit të tij Endrit Braimllari, i cili tashmë është pjesë e PS-së. Meta e akuzon Brahimllarin se është "konvertuar" nga SPAK në radhët e rilindasve, ndërsa mohon deklaratat e këtij të fundit që pretendon se nuk ka lidhje me dosjen e lobimeve të LSI-së.
Në një postim në Facebook, Meta e ka cilësuar Braimllarin si "shembullin më të gjallë të mënyrës se si SPAK-u arrin t’i konvertojë njerëzit pa karakter në 'rilindas' të denjë dhe gënjeshtarë".
"Vetëm një 'rilindas' mund të harrojë firmat që ka hedhur vetë dhe arsyet për të cilat i ka hedhur", vijon Meta në reagimin e tij, duke iu referuar lobimeve të Lëvizjes Socialiste për Integrim në SHBA gjatë viteve 2018–2019.
Sipas tij, firma për këto lobime i përket pikërisht Endrit Braimllarit, i cili në atë kohë mbante pozita të larta në parti.
“Në atë kohë unë nuk isha kryetar i LSI-së, por President i Republikës. Për firmat e tij unë qëndroj në izolim ekstrem, ndërsa Endriti ‘gradohet’ nënkryetar i Këshillit Bashkiak të Tiranës”, thekson Meta.
Në fund të deklaratës, ai hedh hije dyshimi edhe mbi drejtuesin e SPAK-ut, Altin Dumani, duke ngritur pyetjen nëse "është ai që gënjen në shkresën zyrtare të firmosur prej tij".
Reagimi i Metës vjen në një kohë kur SPAK ka rritur hetimet për financimet e dyshimta të partive politike, përfshirë dhe dosjen e lobimeve të LSI-së në SHBA. Ndërkohë, as Braimllari dhe as SPAK nuk kanë reaguar ende ndaj akuzave të fundit të ish-presidentit.
Lini një Përgjigje