FLASH
Shkruar nga Pamfleti
Gjykata Kushtetuese e bëri publik vendimin e saj të premten në mbrëmje, pas një pritjeje të gjatë që përfshiu drejtpërdrejt kryeministrin Edi Rama dhe zëvendëskryeministren Belinda Balluku.
Pas mbledhjes së qeverisë në orët e paradites, Edi Rama qëndroi për një kohë të gjatë në zyrën e tij në Kryeministri. Edhe Belinda Balluku, pas një daljeje të shkurtër, u rikthye në godinën qeveritare në orët e para të mesditës.
Fillimisht u krijua përshtypja se të dy do ta prisnin në Kryeministri vendimin e Gjykatës Kushtetuese. Megjithatë, zgjatja e procesit përtej orarit të pritshëm dhe mungesa e një njoftimi zyrtar gjatë pasdites, çoi në largimin e tyre nga zyrat përkatëse.
Vendimi u shpall rreth orës 22:00, në një moment kur godina qendrore e qeverisë nuk kishte më aktivitet. Dritat ishin të fikura dhe ambientet bosh, ndërsa lajmi u bë publik jashtë orarit institucional.
Vendimi i Kushteteses për Ballukun
Shpallja e vonuar e vendimit nënvizoi një ditë pritjeje të pazakontë për qeverinë, e cila përfundoi pa praninë e drejtuesve kryesorë në Kryeministri.
Pas rreth 2 muajve e gjysmë, Gjykata Kushtetuese u shpreh sot, 6 shkurt, për kërkesën e paraqitur nga qeveria lidhur me vendimin e Gjykatës së Posaçme Kundër Korrupsionit dhe Krimit të Organizuar (GJKKO), e cila në muajin nëntor 2025 vendosi pezullimin nga detyra të Belinda Ballukut, në cilësinë e zëvendëskryeministres dhe ministres së Infrastrukturës dhe Energjisë.
Pas mbledhjes që nisi që prej orës 11:00, është vendosur që të rrëzohet padia e qeverisë, pasi gjyqtarët kanë votuar 4 pro dhe 4 kundër, duke mos arritur kuorumin e nevojshëm. Kështu, është rikthyer masa e pezullimit nga detyra për Belinda Ballukun, e cila ishte hequr më 12 dhjetor 2025, po me verdikt të kësaj gjykate.
Lini një Përgjigje