FLASH
Shkruar nga Pamfleti
Partia Demokratike depozitoi në KQZ kërkesën për regjistrimin e koalicionit Partia Demokratike – Aleanca për Shqipërinë Madhështore”, me shkronjat nistore “PD-ASHM”, pak minuta para se të skadonte afati ligjor për regjistrimin e koalicioneve për zgjedhjet parlamentare të 11 majit.
Në koalicion përfshihen 26 parti, mes të cilave edhe PDIU e Shpëtim Idrizit, e cila u ‘dorëzua’ në orët e fundit duke pranuar vetëm ofertën e demokratëve të Sali Berishës, për të pasur vetëm 1 kandidat të sigurtë në listën e deputetëve.
Ashtu sikundër kishte deklaruar, Berisha ka arritur të krijojë koalicionin më të madh sasior, duke rreshtuar pas PD-së plot 25 parti, pavarësisht peshës së tyre elektorale. Mes aleatëve të Berishës është edhe Aleanca Arbnore Kombëtare e Gjet Ndoj. Ky i fundit në 2013 ishte në koalicionin e drejtuar nga Edi Rama, madje duke pasur edhe rolin e koordinatorit mes tij dhe partive që në atë kohë rreshtoheshin në krah të Edi Ramës.
Madje shumë nga ato parti sot janë rreshtuar në krah të Berishës, por Ndoj nuk ka marrë nga kreu i PD-së ndonjë ‘ofiq’ për të koordinuar raportet mes partisë më të madhe opozitare dhe aleatëve të saj. Këtë detyrë Berisha ia ka besuar Flamur Nokës, Sekretarit të Përgjithshëm të PD-së, i cili drejtoi edhe negociatat mes kësaj partie dhe subjekteve të tjera që u përfshinë në koalicionin ‘PD-ASHM’.
Lini një Përgjigje