FLASH
Shkruar nga Pamfleti
Zbardhen detaje të reja nga ngjarja e ndodhur një ditë më parë në Korçë, ku gjatë një operacioni antidrogë dy efektivë policie u përfshinë në një aksident rrugor, ndërsa njëri prej tyre mbeti i plagosur.
Sipas burimeve policore, efektivët e Policisë së Korçës kishin organizuar një aksion për goditjen e shpërndarjes së lëndëve narkotike në zonë. Gjatë operacionit, ata kanë identifikuar një person që dyshohej se sapo kishte blerë drogë nga shtetasi Vangjush Dushku.
Në momentin që policia tentoi ta ndalonte, i dyshuari është larguar me automjet, duke detyruar efektivët ta ndjekin. Ndjekja përfundoi me një aksident rrugor, pasi makina e policisë u përplas me automjetin e personit që po ndiqej. Menjëherë pas përplasjes, Dushku u arrestua.
Paralelisht, pjesëtarë të tjerë të grupit hetimor ushtruan kontroll në një lokal në fshatin Lumalas, ku Vangjush Dushku punonte si kamarier. Gjatë kontrollit, policia gjeti doza të tjera të lëndëve narkotike si në trupin e Dushkut, ashtu edhe në ambientet e lokalit, gjë që çoi në arrestimin e tij.
Ndërkohë, pronari i lokalit është shpallur në kërkim, pasi dyshohet se ambienti përdorej për shitjen e drogës.
Policia po vijon hetimet për dokumentimin e plotë të aktivitetit kriminal dhe identifikimin e personave të tjerë të përfshirë në këtë veprimtari.
Efektivi i plagosur ndodhet në spitalin e Tiranës dhe, sipas mjekëve, është jashtë rrezikut për jetën.
Lini një Përgjigje