FLASH
Shkruar nga Pamfleti
Është ekstraduar nga Koreja e Jugut në Shqipëri, Ervin Shahini i dënuar me burgim të përjetshëm për vrasje dhe plagosje.
Është publikuar fotoja e Ervin Shahinit i njohur ndryshe si vrasësi i taksistëve, i cili u ekstradua nga Koreja e Jugut.
50-vjeçari që përdor edhe identitetin tjetër Spartak Lazaj, është shpallur fajtor me vendim të formës së prerë për veprat penale vjedhje me dhunë me pasojë vdekjen, vjedhje me dhunë e kryer në bashkëpunim dhe largim i të burgosurit nga vendi i qëndrimit.
Në vitin 1995, Ervin Shahini ka vrarë dhe ka plagosur me thikë disa taksistë. Pasi i faturonte si taksi për të shkuar në destinacionet e kërkuara, 50-vjeçari i godiste me thikë drejtuesit e automjeteve, iu merrte makinat dhe largohej nga vendi i ngjarjes.
Ministri i Brendshëm, Taulant Balla ka reaguar në lidhje me ekstradimin nga Koreja e Jugut e Ervin Shahinit alias Spartak Lazaj, i cili akuzohet për vrasje dhe plagosje.
Përmes një mesazhi, Balla thekson se po i jepet goditje pandëshkueshmërisë.
"GODITJA E PANDËSHKUESHMËRISË! Po punojmë çdo ditë, me intensitet, me Interpol për gjetjen e personave në kërkim nga drejtësia, për t’i dhënë fund pandëshkueshmërisë ndaj personave që fshihen në vende të tjera apo në Shqipëri.
Përgëzime Policisë së Shtetit, Prokurorisë së Përgjithshme, Interpol Tirana dhe Seulit si dhe Sekretariatit të Përgjithshëm të Interpolit (Sektori Fugitives Investigative Support (FIS)), për bashkëpunimin, koordinimin dhe finalizimin me sukses të ndalimit dhe ekstradimit të një shtetasi të dënuar me burgim të përjetshëm për krime të rënda kundër personit", shprehet Taulant Balla.
Lidhur me ngjarjen mediat koreane ditën e djeshme kanë dhënë detaje të tjera.
Sipas mediave vendase, burri nga Shqipëria u natyralizua pasi u martua me një grua koreane në vitin 2012, u riatdhesua me forcë në vendin e tij. Më pas u zbulua se ai ishte arratisur nga Shqipëria pasi kishte kryer një vrasje dhe grabitje. Sipas dokumenteve të ekstradimit, Shahini goditi për vdekje një taksist në Shqipëri në gusht të vitit 1995 dhe vodhi taksinë dhe u arratis. Përveç kësaj, ai u dënua me burgim të përjetshëm për akuzat e tentativës për grabitje dhe vrasje tre herë.
Në mars të vitit 1997, kur u burgos, shpërtheu lufta civile dhe Shahini arriti të arratisej duke përfituar nga kaosi. Në atë kohë, vodhi emrin e një personi tjetër me aftësi të kufizuar intelektuale, ka nxjerrë një pasaportë me këtë emër dhe ka ikur nga Shqipëria. Pas kësaj kohe, jetonte në Shtetet e Bashkuara dhe Kanada, ndërsa hyri në Kore në nëntor 2011. Ai madje u martua me një grua koreane vitin e ardhshëm dhe mori shtetësinë koreane në dhjetor 2015.
Pikërisht në korrik të vitit të kaluar u zbulua se 50-vjeçari kishte jetuar me identitetin e tij të fshehur. Ministria e Drejtësisë bashkëpunoi me autoritetet shqiptare për identifikimin e tij dhe nisi procedurat gjyqësore për ekstradimin dhe anulimin e lejes së qëndrimit në Gjykatën e Lartë të Seulit.
Atij iu hoq shtetësia e Republikës së Koresë dhe u riatdhesua në Shqipëri. Ministria e Drejtësisë së Koresë së Jugut tha: “Është një shembull i gatishmërisë së qeverisë për të siguruar që kriminelët të ndëshkohen në përputhje me fajin dhe për të mbrojtur popullin e Republikës së Koresë nga krimet shtesë. Ne do të forcojmë rrjetin tonë të bashkëpunimit ndërkombëtar për të mbrojnë sigurinë e njerëzve”.
Lini një Përgjigje