FLASH
Shkruar nga Pamfleti
Një plagosje e rëndë me thikë është regjistruar në orët e vona të mbrëmjes së djeshme në qytetin e Librazhdit, ku një 46-vjeçar mbeti i plagosur dhe u dërgua për mjekim në spital.
Sipas njoftimit të Policisë së Elbasanit, në pranga është vënë autori i dyshuar i ngjarjes, shtetasi H.D., 75 vjeç, banues në Librazhd, i cili akuzohet se ka plagosur me mjet prerës shtetasin S.M., 46 vjeç.
Nga hetimet paraprake dyshohet se në ngjarje janë përfshirë të paktën katër persona. Policia bëri të ditur se ka arrestuar gjithashtu A.H., 48 vjeç, i cili dyshohet se ka ndihmuar autorin duke fshehur armën e krimit pas ngjarjes.
Në lidhje me rastin është proceduar penalisht edhe bashkëshortja e A.H., pasi dyshohet se nuk ka kallëzuar krimin. Po ashtu, nën procedim është marrë edhe vetë i dëmtuari, 46-vjeçari S.M.
Sipas policisë vendore, i plagosuri ndodhet në spital dhe po merr trajtim mjekësor.
Autoritetet po vijojnë hetimet për të sqaruar plotësisht rrethanat dhe motivet e konfliktit, të cilat paraprakisht dyshohet të kenë qenë të dobëta.
“Plagosi me thikë, një 46-vjeçar, gjatë një konflikti për motive të dobëta, vihet në pranga. Vihet në pranga dhe një 48-vjeçar, pasi dyshohet se ka fshehur thikën dhe nuk ka njoftuar Policinë, për ngjarjen.
Procedohen penalisht bashkeshortja e 48-vjeçarit, e cila dyshohet ka bashkëpunuar për të fshehur thikën e përdorur për plagosjen, dhe shtetasi i dëmtuar, pasi të dy kanë refuzuar të japin informacione për rrethanat e ngjarjes.
Shërbimet e Komisariatit të Policisë Librazhd, menjëherë pas njoftimit për konfliktin e ndodhur mbrëmjen e djeshme, në afërsi të urës së qytetit të Librazhdit, organizuan punën për zbardhjen e rrethanave dhe identifikimin e shtetasve të përfshirë.
Si rezultat i veprimeve të shpejta hetimore, u bë e mundur kapja dhe arrestimi në flagrancë i shtetasve: -H. D., 75 vjeç, banues në Librazhd, për veprën penale “Plagosja e rëndë me dashje”; -A. H., 48 vjeç, banues në Librazhd, për veprat penale “Moskallëzimi i krimit” dhe “Veprime që pengojnë zbulimin e së vërtetës”.
Nga hetimet dyshohet se më datë 04.03.2026, rreth orës 20:20, gjatë një konflikti për motive të dobëta, shtetasi H. D. ka goditur me mjet prerës (thikë), shtetasin S. M., 46 vjeç, banues në Librazhd, i cili është në kujdesin e mjekëve, jashtë rrezikut për jetën.
Shtetasi A. H. dyshohet se ka fshehur mjetin prerës me të cilin është kryer plagosja, si dhe nuk ka raportuar në Polici, për ngjarjen.
Gjithashtu, nisi procedimi penal për shtetasit: -E. H., 44 vjeçe, banuese në Librazhd (bashkëshortja e shtetasit A. H., e cila ka qenë në vendngjarje), për veprat penale “Moskallëzimi i krimit” dhe “Veprime që pengojnë zbulimin e së vërtetës”; -S. M., 46 vjeç, banues në Librazhd, për veprën penale “Moskallëzimi i krimit”.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Elbasan, për veprime të mëtejshme”.", njofton policia.
Lini një Përgjigje