FLASH
Shkruar nga Pamfleti
Prokuroria e Posaçme ka zbardhur detaje të reja nga hetimet ndaj oficerit të Policisë së Shtetit, Rezart Kuçi, i dyshuar për lidhje me elementë të krimit të organizuar dhe përfshirje në aktivitete të paligjshme.
Sipas dosjes hetimore, tarifa për përdorimin e aplikacionit të enkriptuar Sky ECC nga Kuçi është paguar nga shtetasi Ervis Matodashaj, aktualisht i shpallur në kërkim në kuadër të operacionit kundër grupit kriminal të Inez Hajrullës.
Në komunikimet e siguruara nga hetuesit, evidentohet ndërhyrja e Kuçit për rinovimin e shërbimit të koduar. “Fol icik me atë të Sky se më mbyllet sot”, i drejtohet ai Matodashajt, i cili më pas kontakton një person të regjistruar si “Servisi” për të realizuar pagesën. “O vlla më bëj një ofertë 6 mujore…”, shkruan Matodashaj, ndërsa përgjigjja vjen: “5 minuta është gati”.
Nga hetimet rezulton se Matodashaj ka kryer një pagesë prej 1200 eurosh për rimbushjen e llogarisë së Kuçit në këtë platformë komunikimi, e përdorur për shkëmbime të fshehta mes personave të përfshirë në aktivitete kriminale.
SPAK thekson se Kuçi, në cilësinë e oficerit të policisë dhe drejtuesit në sektorin e krimeve, ka krijuar marrëdhënie të qëndrueshme bashkëpunimi me persona të përfshirë në krim të organizuar. Sipas akuzës, ai ka përfituar pagesa dhe ka përdorur mjetet e enkriptuara për të shkëmbyer informacione sensitive, duke kompromentuar funksionin e tij zyrtar.
Në dosje përmenden gjithashtu implikime të tij në dhënie informacioni kundrejt përfitimeve, si dhe dyshime për përfshirje në episode të trafikimit të narkotikëve.
Biseda mes tyre:
Rezart Kuçi: Fol icik me atë të sky se më mbyllet sot
Ervis Matodashaj: Po i shkruajta
Dhe Matodashaj i dërgon mesazhin që i ka nisur një kontakti të regjistruar me emrin
Servisi: O vlla më bëj një ofertë 6 mujore të të nis lekët me fugon se jam në Vlorë
Servisi: 5 minuta është gati
Lini një Përgjigje