FLASH
Shkruar nga Pamfleti
Zbardhen detaje të tjera mbi goditjen e grupit kriminal shqiptaro-grek, të akuzuar si përgjegjës për tentativën e vrasjes së mafiozit grek Jani Lala.
Sipas mediave greke, grupi rezulton se ishte vetëm pak ditë larg ekzekutimit të një kontrate-vrasjeje ndaj një prej figurave më të rëndësishme të botës së natës në Pire. Bandat kishin shënjestruar një personazh të njohur, i quajtur nga mediat greke si “kumbari i madh”, një figurë e fuqishme që sundonte territore, linja sigurie të klubeve të natës dhe rrjetin e karburanteve në zonën e Pireut.
Sipas informacionit të zbardhur nga hetimet, objektivi i organizatës kriminale ishte një emër i fuqishëm i mafies greke, ish-bashkëpunëtor i ngushtë i Mihalis Zambounis, boss-i i eliminuar në fillim të vitit 2024. Pasi rrjeti u përça, “kumbari i madh” u shkëput dhe u kthye në një lojtar të pavarur – lëvizje që, sipas policisë, krijoi konflikt të hapur me grupin që drejtohej nga Dhimitër Meci (“Dimitrios Metsis” alias “Dimos”), 45 vjeç, shqiptar me profil të gjatë kriminal.
Burime të brendshme thanë për mediat greke se marrëdhënia mes tyre ishte dikur e afërt: “Kur ‘Modeli’ ishte në ekip me Zambounin, aty ishte edhe ‘Dimos’. Pas ndarjes së rrjetit, ‘Dimos’ vendosi ta heqë qafe ish-aleatin e tij, i cili ishte rritur shumë në botën e krimit.”
Policia thotë se grupi kishte përfunduar fazën e vëzhgimit, kishte monitoruar lëvizjet e objektivit me kamera të fshehta dhe ishte gati të kryente atentatin gjatë periudhës së festave të Krishtlindjeve, duke përdorur një Kallashnikov, i cili u gjet më pas në një bazë të tyre në Marina Zeas.
Detajet e grupit
Tre prej tyre janë arrestuar, ndërsa një shqiptar i katërt është shpallur në kërkim. Bashkë me ta janë arrestuar edhe tre shtetas grekë, përfshirë edhe një femër.
Në prangat e “FBI-së” greke kanë rënë Dhimitër Meci alias Dimitrios Metsis, 45 vjec nga Labova e Poshtme e Gjirokastrës, Andrea Brokeri, 32 vjec nga Himara dhe Fatjon Prendi alias Fatjion Prendi, 39 vjec nga Lezha, ndërsa në kërkim është shpallur Vasil Theohari, 31 vjec nga fshati Krongj i Finiqit.
Ata akuzohen se janë autorë të ngjarjes së ndodhur në 16 maj 2025, kur ndaj automjetit të blinduar të 41-vjecarit grek Jani Lala, u qëllua rreth 50 herë me armë zjarri, por pa mundur ta vrasin e as ta plagosin.
Të arrestuarit kishin monitoruar objektivat e tyre me automjete, pasi kishin instaluar kamera të fshehta, duke pasur kështu mundësinë të kishin një pamje 24-orëshe.
Konkretisht, ata kishin parkuar një furgon prodhim italian, përballë karburantit të Lalës, në panelin e kontrollit të të cilit kishin montuar një kamerë.
Më 16 maj, kur Lala doli nga karburanti, ata e panë atë duke përdorur mjetet teknologjike që kishin në dispozicion dhe e sulmuan duke e qëlluar me një Kallashnikov. Dy javë pas përpjekjes së dështuar për të vrarë Lalën në karburantin e tij, të dyshuarit u përpoqën përsëri të regjistronin lëvizjet e tij me të njëjtën makinë në një tjetër karburant që ai kishte në dispozicion. Megjithatë, automjeti u pikas më pas nga një punonjës i pikës së karburantit, ndërsa policia gjeti kamerën e fshehur.
Sipas policisë, të njëjtët individë kishin kryer edhe sulmin me zjarrvënie në një pikë karburanti në Argyroupoli më 23 shkurt.
Një nga të arrestuarit është Fatjon Prendi.
Lini një Përgjigje