FLASH
Shkruar nga Pamfleti
Eugert Sino, i arrestuar nga policia si personi që kishte në pronësi furgonin me mbishkrimin “mirëmbajtja e rrugëve” i gjetur te “Myslym Shyri”, ku u zbulua arsenali i armëve, ka mohuar të jetë i implikuar.
Ai është shprehur para hetuesve furgoni ishte vënë në emër të tij, pasi ia kishte kërkuar një shok i tij. 34-vjeçari ka dhënë vetëm emrin e tij, pasi mbiemrin ka thënë se nuk e mbante mend.
“Nuk kam lidhje me armët e gjetura në furgon. Kam çelësin e tij, por s’e dija çfarë kishte në pjesën e pasme. Këtë furgon e kam në pronësi unë, sepse ma kërkoi një shok ta vendosja në pronësinë time. Shoku quhet Bledar, shkurt i thërrasim Bledi, mbiemrin nuk ja di si e ka.”-është shprehur 34-vjeçari.
Ky emër i dhënë Sinos, është marrë me rezerva nga oficerët e policisë, pasi nga hetimet një person i tillë nuk rezulton i përfshirë.
Nga verifikimet 34-vjeçari rezulton se ka qenë banakier në lokalin Monopol Lounge në pronësi të Aurel Hoxhës të shpallur në kërkim nga SPAK si drejtues i një grupi kriminal që porositi vrasjen e Klevis Lleshit në 2020.
Policia po heton nëse dhe arsenali prej 23 armësh, mes të cilave 5 snajperë, kishte lidhje me këtë personazh, kjo edhe për faktin se furgoni qëndronte fare pranë lokalit Monopol në rrugën Myslym Shyri.
Dyshohet se furgoni prej 3-4 muajsh qëndronte i palëvizur së bashku me armët brenda tij, për të cilat në kërkim janë shpallur edhe dy persona, identiteti i të cilëve nuk bëhet me dije nga policia.
Lini një Përgjigje