FLASH
Shkruar nga Pamfleti
Vrasja e Ilaria Sulës, 22-vjeçares shqiptare e cila u masakrua me thikë nga ish i dashuri i saj Mark Samson dhe u gjet e pajetë e hedhur nga një shkëmb në zonën pyjore të Polit, është e mbushur me mister.
Prindërit e Ilarias, Flamur e Gëzime Sula, si edhe vëllai i saj, Leon, kërkojnë drejtësi dhe të zbardhet e vërteta e krimit si edhe personat e tjerë të përfshirë në vrasje.
Të pyetur në një deklaratë për gazetarët nëse Mark Samson ka pasur bashkëfajtor, babai i viktimës u përgjigj se: “Nuk dua të jem ai që do t’i drejtoj gishtin askujt, policia dhe prokurorët po punojnë. E vërteta do të dalë në shesh”.
Gjithashtu ka deklaruar se vajza e tij, Ilaria kurrë nuk do të kishte shkuar në banesën e 23-vjeçarit.
Ai është shprehur se e bija nuk ka shkuar me dëshirë në shtëpinë e Mark Samson, ku edhe dyshohet se u masakrua me thikë.
“Ajo nuk do të kishte shkuar kurrë në shtëpinë e ish-it të saj”, deklaroi Flamur Sula duke shtuar se: “Ilaria nuk shkoi kur ishin të lumtur bashkë, e shkoi kur u ndanë? Është absurde. Kush ishte Ilaria? Vetëm shikoni përreth, vetëm dëgjoni njerëzit të flasin. Ajo kishte aq shumë ëndrra, aq shumë ëndrra… donte të bëhej financiere. Më tha ‘ke një vajzë të mrekullueshme dhe duhet të jesh e lumtur për vajzën që ke’. Po bëhej gati të diplomohej në tetor”.
Flamur Sula komentoi letrën ku vrasësi i kërkonte falje për krimin e kryer.
“Të kërkojë falje? Jo tani, ndoshta pas 30 apo 40 vjetësh Nuk e prisnim letrën në këtë kohë. Ai thotë se po qan, por ne kemi 20 ditë që qajmë për vajzën tonë. Ilaria nuk e meritonte këtë fund. Ajo ishte një vajzë e mrekullueshme”, tha babai i 22-vjeçares.
Në lidhje me pretendimin e Mark Samsonit se e donte Ilarian, babai i saj e quajti këtë një tradhti të pafalshme. Ai theksoi se, nëse dikush do të donte një person, nuk mund të shkonte deri në pikën e vrasjes së tij. “Kur Ilaria u zhduk, Mark Samson më tha: ‘Unë e dua Ilarian, nuk do ta lëndoja kurrë’. Por përkundrazi, ky ishte realiteti,” shtoi ai.
Lini një Përgjigje