FLASH
Shkruar nga Pamfleti
Rezultati i 11 majit i dha Edi Ramës një shumicë të fortë parlamentare, e cila, përtej çdo makinacioni, tregoi se opozita nuk po arrin të fitojë mbështetje tek elektorati ose të ringjallë besimin e shqiptarëve...
Kanë kaluar më shumë se 5 muaj që nga zgjedhjet e 11 majit, ku opozita regjistroi një nga rezultatet më të dobëta zgjedhore në 34 vjet pluralizëm, zërat që në ditët e para pas procesit këmbëngulën për një analizë të asaj që kishte ndodhur pothuajse janë shuar.
Sot, askush në PD nuk flet për analiza, ndërsa duket se po presin një lëvizje nga kreu i Partisë Demokratike Sali Berisha, i cili vazhdon të mbajë fort tezën se më 11 maj nuk pati zgjedhje, por një farsë zgjedhore. Ky qëndrim mbështetet edhe nga raporti përfundimtar i OSBE/ODIHR-it, i cili nxjerr në pah një sërë problemesh që lidhen me zgjedhjet, por këmbëngul që partitë të ulen dhe të reformojnë Kodin Zgjedhor.
Në fakt, problemi me zgjedhjet në Shqipëri për sa i përket përmbushjes së standardeve nuk lidhet me Kodin, por me vullnetin politik të aktorëve dhe faktorëve pjesëmarrës në proces për të respektuar rregullat e një fushe loje të barabartë, gjë që mungonte më 11 maj, dhe kjo dëshmohet edhe në raportin e vëzhguesve ndërkombëtarë.
Zgjedhjet e 11 majit 2025 ishin një moment vendimtar për opozitën shqiptare. Pas përplasjeve të forta që filluan në fund të vitit 2021 për shkak të përjashtimit të Sali Berishës nga Grupi Parlamentar nga Lulzim Basha, kreu i atëhershëm i Partisë Demokratike, demokratët nën udhëheqjen e Berishës hynë në një garë elektorale me premtimin e "reformimit dhe bashkimit".
Por duket se skema dështoi, edhe nëse nuk parandaloi manipulimin, siç u pretendua. Rezultati i 11 majit i dha Edi Ramës një shumicë të fortë parlamentare, e cila, përtej çdo makinacioni, tregoi se opozita nuk po arrin të fitojë mbështetje në elektorat, apo të ringjallë besimin e shqiptarëve.
Pas shpalljes së rezultateve, pati një mori reagimesh që kërkonin analizë, llogaridhënie, madje duke drejtuar gishtin e përgjegjësisë ndaj Sali Berishës në lidhje me mënyrën se si ndërtoi listat e kandidatëve për deputetë, apo si arriti një marrëveshje në Kuvend me socialistët e Edi Ramës për ndryshimet në Kodin Zgjedhor.
Nga ana tjetër, pati premtime nga Berisha dhe shumë figura të tjera në udhëheqjen e PD-së se do të kishte një analizë të thelluar, e cila pritej të fillonte në shtator, por ndërsa tetori po mbaron, kreu demokrat nuk ka 'guxuar' as të thërrasë një mbledhje të Këshillit Kombëtar.
Narrativa zyrtare e PD-së pas zgjedhjeve u përqendrua te “parregullsitë zgjedhore”, duke akuzuar Kryeministrin Edi Rama për një skemë manipulimi të zgjedhjeve që filloi nga presionet dhe blerja e votave, deri te përfshirja në krim në mbështetje të PS-së dhe kandidatëve të saj. Ndërsa pak kohë më parë ata akuzuan Lulzim Bashën se mendonte më shumë për vendin e tij sesa për analizën e humbjes në vitin 2021, pas humbjes në vitin 2025 u zgjodh një strategji tjetër: nuk u mbajt asnjë Kuvend i Jashtëzakonshëm, por pozicionet në Grupin Parlamentar, Komisionet Parlamentare u ndanë me nxitim, ndërsa “status quo”-ja u ruajt në strukturën e partisë.
Nëse do të kryhej një analizë e plotë pas 11 majit, do të dilte në pah përgjegjësia me emra konkretë në lidhje me organizimin e fushatës apo kontributin në fushatë, por edhe strategjinë e gabuar që u ndoq.
Kjo mund të penalizojë 10 nga 12 kryetarët e qarqeve, ku demokratët jo vetëm humbën, por pësuan edhe goditje të forta elektorale, duke përfshirë Tiranën, Fierin dhe Elbasanin.
Prandaj, shtyrja e një analize për 11 maj nuk duket thjesht si një vendim rutinë, por një qëndrim politik që tregon qartë se përtej çdo problemi në zgjedhje, PD nuk është e gatshme të ndryshojë.
Dhe kjo nuk ka të bëjë me ndryshimin e presidentit, i cili, siç deklaroi ai, do të kandidojë përsëri në pranverën e vitit 2026, por me rinovimin e shumë prej pozicioneve drejtuese. /Pamfleti/
Lini një Përgjigje