FLASH
Shkruar nga Kreshnik Spahiu
Bllofet e Trumpit synojnë të krijojnë imazh të fortë si lider i hekurt. Ai e përdor kërcënimin si mjet për të arritur marrëveshjen.
Faktikisht, SHBA-ja nuk hyri në asnjë luftë të re gjatë mandatit të parë të Donald Trump (2017–2021). Bllofi është një taktikë klasike e Trumpit, jo vetëm në politikën e jashtme, por edhe në biznes. Ndoshta Trump po luan një “bllof strategjik” edhe ndaj Iranit, ku kërcënon me luftë ose presion ekstrem – por, në realitet, qëllimi final i tij është të arrijë një marrëveshje të re dhe të favorshme për SHBA-në.
Gjatë mandatit të parë, Trump:
• Tërhoqi SHBA-në nga marrëveshja bërthamore me Iranin (JCPOA) në 2018.
• Vendosi sanksione shumë të rënda ndaj Iranit.
• Urdhëroi vrasjen e gjeneralit iranian Qassem Soleimani në janar 2020.
Kjo tregon se nuk ka qenë vetëm retorikë – ai veproi fort kundër Iranit, në mënyrë agresive.
Si funksionon “bllofi” nga Trump:
Fillon me kërcënim maksimal ose retorikë shumë të ashpër. Dërgon trupa apo avionë në rajon. Vendos sanksione të ashpra që të krijojnë frikë dhe ta gjunjëzojnë.
Tensionon deri në prag lufte.
• Shembulli më i famshëm: vrasja e gjeneralit Qassem Soleimani.
Në atë moment, bota mendoi se lufta SHBA–Iran ishte e pashmangshme, por ndërhyrja nuk ndodhi.
Ofron “marrëveshje” si zgjidhje e paqes.
• Në vend që të niste luftë, ai shpesh i ofron armikut një marrëveshje, por në kushtet e tij.
• Shembull: Tha se do të negocionte me Iranin për një “marrëveshje më të mirë sesa ajo e Obamës”.
• Në realitet, nuk u arrit marrëveshje, por taktika ishte klasike: “presion për negociatë”.
Bllofet e Trumpit synojnë të krijojnë imazh të fortë si lider i hekurt. Ai e përdor kërcënimin si mjet për të arritur marrëveshjen. Kryesisht, ai shmang çdo luftë, sepse ka intuitë biznesi dhe nuk dëmton ekonominë. Tensionet ushtarake i përdor për efekt elektoral.
A mund të ndodhë sërish bllofi me Iranin?
Ndoshta… Trump ka të ngjarë të luajë një bllof të llogaritur ndaj Iranit. Ai do të kërcënojë deri në minutën e fundit me luftë dhe do të krijojë presion të madh, por në fund mund të negociojë një marrëveshje, në mënyrë që të paraqitet si “njeriu që e mbrojti SHBA-në pa derdhur gjak”. Kjo përputhet me stilin e tij të udhëheqjes dhe strategjisë së tij si “bllofist”. Fatkeqësisht, një bllof i kuptuar nga kundërshtarët rrezikon ta nxjerrë më të dobët këtë radhë në sytë e gjithë planetit, kur bombat po rrafshojnë Teheranin dhe Tel Avivin. Gjithsesi, të presim nëse Trump do të ketë apo jo kurajën për të firmosur për herë të parë në jetën e tij urdhrin e futjes së SHBA-së në luftë me një shtet tjetër. Shpesh, paqja është më e vështirë se lufta…
Lini një Përgjigje