FLASH
Shkruar nga Pamfleti
Presidenti i SHBA-së, Donald Trump, ka deklaruar se Shtetet e Bashkuara synojnë të marrin kontrollin e Kubës “pothuajse menjëherë”, duke theksuar se fillimisht do të përfundojë operacioni në Iran.
Komentet u bënë gjatë një fjalimi në një darkë private të Forum Club në West Palm Beach, Florida, ku ai u ndal edhe te çështja e programit bërthamor iranian.
“Nuk mund t’i japësh Iranit një armë bërthamore. Kjo është e gjitha që mund të them”, u shpreh Trump.
Presidenti i SHBA paralajmëroi për pasojat që, sipas tij, mund të kishte një Iran i armatosur bërthamor.
“Do ta përdornin shumë shpejt në një vend të quajtur Izrael... dhe mendoj se ne do të ishim të radhës, dhe kjo nuk do të ndodhë”, u shpreh ai.
Nga ana tjetër, Irani ka mohuar vazhdimisht se programi i tij bërthamor është për qëllime ushtarake.
Gjatë fjalës së tij, Trump foli edhe lidhur me gjendjen e forcave ushtarake iraniane, duke pretenduar se “forca ajrore e tyre tani është inekzistente”, ndërsa për flotën detare shtoi se: “Çdo anije është në fund të detit tani”.
Ai tha gjithashtu se SHBA dhe Izraeli kanë shkatërruar “85%” të kapaciteteve raketore të Iranit, pa ofruar burime të pavarura verifikimi.
Megjithatë, presidenti amerikan la të kuptohet se situata mbetet e pasigurt. “Me luftë, nuk e di kurrë se çfarë ndodh. Mendoj se do ta përfundojmë, por është një periudhë e vështirë”, tha ai.
Deklarata për Kubën nuk u shoqërua me detaje konkrete, duke mbetur e paqartë nëse bëhet fjalë për një plan të mirëfilltë apo një qëndrim politik.
Lini një Përgjigje