FLASH
Shkruar nga Pamfleti
Tre persona mbetën të plagosur nga shpërthimi në hyrje të një pallati në Monako. Mes tyre ndodhen biznesmeni ukrainas Vadym Yermolaev, bashkëshortja e tij dhe djali 13-vjeçar. Autori i dyshuar është ende në arrati…
Një shpërthim i fuqishëm ndodhi të hënën në mbrëmje në një ndërtesë banimi në Monako, duke lënë të plagosur tre persona, mes të cilëve biznesmenin dhe oligarkun ukrainas Vadym Yermolaev, bashkëshorten e tij dhe djalin e tyre 13-vjeçar. Sipas mediave lokale, Yermolaev ndodhet në gjendje të rëndë.
Fotografitë nga vendngjarja tregojnë hyrjen e përgjakur të ndërtesës Sun’s Palace, në rrugën Rue Révérend Père Louis Frolla, pranë kufirit me Francën. Sipas hetimeve paraprake, autori dyshohet se kishte lënë pranë hyrjes një çantë me lëndë shpërthyese të mbushur me vida dhe objekte metalike, përpara se të largohej. Ai ende nuk është arrestuar.
Princi Albert II i Monakos e dënoi sulmin, duke e cilësuar atë një "krim të neveritshëm". Në deklaratën e tij, ai tha se ngjarja ka tronditur të gjithë komunitetin e Monakos dhe theksoi se principata do të mbetet e vendosur përballë dhunës dhe krimit, duke garantuar se siguria e qytetarëve mbetet prioritet.
Sipas kreut të qeverisë së Monakos, Christophe Mirmand, autori kaloi në këmbë kufirin drejt Francës pas sulmit dhe u identifikua përmes kamerave të sigurisë në Monako dhe në qytetin francez Beausoleil.
Kush është Vadym Yermolaev?
Vadym Yermolaev, 58 vjeç, konsiderohet një nga biznesmenët më të pasur të Ukrainës dhe renditet mes personave me pasurinë më të madhe në vend. Ai banon prej vitesh në Monako dhe ka marrë shtetësinë qipriote që nga viti 2019.
Në dhjetor 2023, autoritetet ukrainase vendosën sanksione ndaj tij me vendim të Këshillit Kombëtar të Sigurisë dhe Mbrojtjes, të miratuar nga presidenti Volodymyr Zelensky. Sipas mediave ukrainase, që cituan burime nga shërbimet e sigurisë, sanksionet u vendosën pasi Yermolaev dyshohej se kishte vazhduar aktivitetet tregtare në Krimenë e aneksuar nga Rusia, veçanërisht në sektorin e shitjes së pijeve alkoolike.
Yermolaev lidhet me Grupin Alef, një konglomerat tregtar dhe industrial i themeluar në vitin 1997, dhe njihet për investimet e tij në zhvillimin e qytetit Dnipro.
Ai është një nga oligarkët ukrainas që u larguan nga vendi pas fillimit të luftës me Rusinë. Në një intervistë për Forbes, kishte deklaruar se kërkoi shtetësi të huaj pasi, sipas tij, sistemi gjyqësor ukrainas nuk i garantonte mbrojtje të mjaftueshme ndërkombëtare.
Yermolaev ka katër fëmijë me bashkëshorten e tij, e cila është stomatologe. Familja jeton prej disa vitesh në Monako.
Autoritetet e Monakos nuk kanë konfirmuar zyrtarisht identitetin e të plagosurve. Prokurori i Përgjithshëm, Stéphane Thibault, pritet të japë më shumë detaje gjatë një konference për shtyp.
Sipas tij, pajisja shpërthyese ishte vendosur brenda një çante ose pakete të lënë në hyrje të ndërtesës përpara se autori të largohej nga vendi i ngjarjes.
Christophe Mirmand deklaroi se, sipas njohurive të tij, ky është sulmi i parë i këtij lloji në historinë e Principatës së Monakos.
Rreth 50 zjarrfikës, përfshirë ekipe të ardhura nga Franca, si dhe 84 efektivë të shërbimeve të sigurisë, morën pjesë në operacionin e emergjencës.
Lini një Përgjigje