FLASH
Shkruar nga Pamfleti
Zëvendësministri i Jashtëm i Rusisë, Alexander Grushko, tha se Rusia do të kërkojë garanci sigurie nga aleanca ushtarake e NATO-s dhe nga SHBA-ja në çdo marrëveshje për Ukrainën.
Sipas mediave të huaja, një pjesë e këtyre garancive që ai përmendi, përfshijnë përjashtimin e Ukrainës nga anëtarësimi në NATO, që është një ambicie e madhe e Presidentit Zelensky.
"Vetëm përmes formimit të garancive të hekurta të sigurisë do të jetë e mundur të arrihet një paqe e qëndrueshme në Ukrainë," i tha Grushko gazetës ruse Izvestia.
Kujtojmë se Presidenti Donald Trump tha më herët sot se ditën e nesërme do të zhvillojë një bisedë telefonike me homologun Vladimir Putin, ku do të diskutojnë një zgjidhje për luftën në Ukrainë.
Në bordin e avionit të tij presidencial, Air Force One, të dielën në mbrëmje, Presidenti i SHBA-së, Donald Trump, njoftoi gazetarët se do të flasë me Presidentin rus, Vladimir Putin, të martën.
Ai tha se është bërë “shumë punë” gjatë fundjavës dhe se do të shohin nëse kanë “diçka për të njoftuar” të martën.
Kjo vjen një javë pasi delegatët e SHBA-së dhe Ukrainës u takuan në Arabinë Saudite, ku njoftuan mundësinë e një armëpushimi 30-ditor – hapi i parë drejt përfundimit të luftës.
Megjithatë, SHBA-ja ende po përpiqet të bindë Rusinë që të pranojë.Lidhur me bisedimet me Putinin, Trump tha: “Mendoj se do të flasim për tokën. Situata është shumë ndryshe nga ç’ishte para luftës, siç e dini. Do të flasim për termocentralet, kjo është një çështje e madhe.
“Por mendoj se kemi diskutuar shumë nga këto tashmë mes të dyja palëve, Ukrainës dhe Rusisë. Jemi duke folur për këtë, për ndarjen e disa aseteve, dhe ata po punojnë për këtë.”
“Ne duam të shohim nëse mund ta përfundojmë atë luftë. Ndoshta mundemi, ndoshta jo, por mendoj se kemi një shans shumë të mirë.”, deklaroi Presidenti i SHBA-së, Donald Trump.
Që nga shkurti i vitit 2022, me mijëra persona, civilë e ushtarakë, kanë humbur jetën në Ukrainë, pas nisjes së sulmit të paprovokuar të Rusisë ndaj fqinjit të saj perëndimor.
Lini një Përgjigje