FLASH
Shkruar nga Pamfleti
Presidenti amerikan Donald Trump ka firmosur dy urdhra ekzekutivë që synojnë të eliminojnë politikën e lirimit me kusht pa pagesë (“cashless bail”) në Uashington D.C. dhe të vendosin dënime të ashpra për ata që përdhosin flamurin amerikan.
Urdhri i parë i jep detyrë Prokurores së Përgjithshme Pam Bondi të identifikojë juridiksionet në SHBA që përdorin sistemin e lirimit pa pagesë dhe të bllokojë ose të tërheqë grantet federale për këto zona. “Ne po e përfundojmë këtë. Po fillojmë nga D.C., sepse atje kemi të drejtën ta bëjmë përmes federalizimit,” tha Trump, duke theksuar se kjo masë do të forcojë autoritetin federal mbi kryeqytetin. Vendimi erdhi pas ndërhyrjes së administratës për të marrë kontrollin mbi forcat e rendit në qytet, duke vendosur mijëra agjentë federalë dhe pjesëtarë të Gardës Kombëtare në rrugë.
Një tjetër urdhër ekzekutiv i firmosur nga presidenti lidhet me përdhosjen e flamurit amerikan. Dokumenti, i rishikuar nga Fox News, urdhëron Departamentin e Drejtësisë të ndjekë penalisht çdo rast të djegies së flamurit. Trump deklaroi se flamuri është “simboli më i shenjtë dhe më i dashur i Shteteve të Bashkuara” dhe se djegia e tij është një akt “fyes, provokues dhe i përdorur shpesh nga grupe të huaja për të kërcënuar amerikanët”. Ai shtoi se kushdo që digjte flamurin duhet të akuzohet për nxitje trazirash dhe të dënohet me një vit burg, pa asnjë mundësi për lirimin e parakohshëm.
Sipas Trump, djegia e flamurit “shkakton trazira në nivele që nuk i kemi parë më parë” dhe për këtë arsye administrata e tij synon ta kriminalizojë përfundimisht këtë akt.
Lini një Përgjigje