FLASH
Shkruar nga Pamfleti
Franca ndodhet në prag të një krize të re politike që mund të tronditë thellë presidencën e Emmanuel Macron. Kryeministri François Bayrou, vetëm pak muaj pas marrjes së detyrës, është përballë një votimi vendimtar besimi më 8 shtator, një votim që duket gjithnjë e më i rrezikshëm për mbijetesën e qeverisë.
Bayrou ka kërkuar miratimin e parlamentit për një paketë të ashpër kursimesh me synimin për të rikuperuar financat publike të vendit. Plani përfshin shkurtimin e 44 miliardë eurove në vit nga shpenzimet shtetërore, një masë drastike për të ulur deficitin buxhetor, i cili vitin e kaluar arriti në 5.8% të PBB-së, pothuajse dyfishin e kufirit të BE-së.
“Franca përballet me një rrezik të menjëhershëm që duhet ta adresojmë, përndryshe nuk kemi të ardhme,” deklaroi Bayrou, duke pranuar se vota është një bast politik i rrezikshëm: “Është e rrezikshme, po, por edhe më e rrezikshme është të mos bësh asgjë.”
Në një situatë të rrallë për politikën franceze, pothuajse gjithë spektri opozitar është bashkuar kundër qeverisë.
-Jordan Bardella (RN, ekstremi i djathtë): “Nuk do të votojmë kurrë për një qeveri që po i bën francezët të vuajnë.”
-Manuel Bompard (LFI, e majta radikale): “Deputetët tanë do të votojnë për rrëzimin e qeverisë.”
-Partitë e Gjelbërve dhe Komuniste kanë konfirmuar gjithashtu votën kundër.
-Olivier Faure (Partia Socialiste): “Është e papranueshme që PS apo ndonjë parti tjetër opozitare të mbështesë këtë qeveri.”
Kjo aleancë e gjerë bën që Bayrou të ketë shumë pak hapësirë manovre për të siguruar votat e nevojshme.
Macron në udhëkryq
Nëse Bayrou humbet votën e besimit, opozita ka paralajmëruar se do të kërkojë shpërndarjen e parlamentit dhe zgjedhje të reja. Por një skenar i tillë është i padëshirueshëm për Macron, i cili pritet të përpiqet ta shmangë me çdo kusht dhe të emërojë një kryeministër të ri në rast dështimi.
Ky skenar do të sillte një tjetër periudhë pasigurie për Francën, në një moment kur vendi përballet me inflacion, borxh të lartë dhe protesta të vazhdueshme sociale.
Vota e 8 shtatorit vjen vetëm dy ditë para protestave të planifikuara kundër paketës së kursimeve, të cilat analistët i krahasojnë me lëvizjen e jelekëve të verdhë (chalecos jaunes) të vitit 2018. Asokohe, revolta popullore kundër rritjes së çmimeve të karburantit e tronditi seriozisht presidencën Macron dhe paralizoi për muaj të tërë qeverinë e tij.
Kjo e bën situatën edhe më të ndezur: një rrëzim i qeverisë së Bayrou, i ndjekur nga protesta masive, mund ta vendosë Macron përballë krizës më të thellë të mandatit të tij të dytë.
Lini një Përgjigje