FLASH
Shkruar nga Pamfleti
Monarku norvegjez foli për përkeqësimin e gjendjes shëndetësore të Princeshës Mette-Marit, shtrimin në spital të Mbretëreshës Sonja dhe polemikat që lidhen me emrin e Jeffrey Epstein...
Në një nga periudhat më të vështira për familjen mbretërore norvegjeze, Mbreti Harald u shfaq qetësues për të ardhmen e monarkisë në vend. Duke folur para gazetarëve, monarku 89-vjeçar deklaroi se “nuk ka asgjë për t’u shqetësuar” sa i përket trashëgimisë së fronit, duke iu referuar djalit të tij, Princit të Kurorës Haakon, si dhe mbesës së tij 22-vjeçare, Princeshës Ingrid Alexandra, e cila aktualisht po studion në Australi.
Deklarata e mbretit vjen në një kohë shqetësimi të madh publik, pasi ai konfirmoi se gjendja shëndetësore e nuses së tij, Princeshës Mette-Marit, është përkeqësuar ndjeshëm. Mette-Marit u diagnostikua me fibrozë pulmonare në vitin 2018 dhe tashmë ka nevojë për mbështetje të përditshme me oksigjen. Së fundmi, ajo u shfaq me tub oksigjeni në hundë gjatë festimeve të Ditës Kombëtare të Norvegjisë.
“Mjekët na kishin paralajmëruar se kjo do të ndodhte, por mendonim se do të vonohej. Fatkeqësisht, tani situata është shumë serioze”, deklaroi Mbreti Harald.
Ai foli gjithashtu për gjendjen e bashkëshortes së tij, Mbretëreshës Sonja, e cila u shtrua me urgjencë në spital më 27 maj për probleme kardiake. Sipas mbretit, ajo mori dje trajtimin e nevojshëm dhe është rikthyer në shtëpi me gjendje fizike dhe morale të përmirësuar.
Përveç çështjeve shëndetësore, Mbreti Harald u pyet edhe për rënien e popullaritetit të monarkisë, e cila në të kaluarën gëzonte mbështetje që arrinte deri në 90%. Debati publik u intensifikua pas përmendjes së emrit të Mette-Marit në dokumente që lidhen me Jeffrey Epstein, si dhe pas një interviste të saj mbi marrëdhënien e dikurshme me të.
Mbreti u distancua nga çështja, duke theksuar se ishte informuar përmes mediave, por njëkohësisht mbrojti princeshën.
“Ajo nuk ka bërë asgjë të paligjshme. Ndryshe nga disa persona të tjerë në Norvegji, ajo e ndërpreu shumë herët këtë kontakt dhe kjo duhet t’i njihet”, tha ai.
I pyetur me humor nëse monarkia norvegjeze mund të shfuqizohet një ditë, Mbreti Harald u përgjigj shkurt: “Nëse ndodh kjo, me siguri unë nuk do të jem më këtu”.
Dmth. me hani hangshi kokat po vdiqa une o morracake.