FLASH
Shkruar nga Pamfleti
Kërkesat kryesore të Teheranit janë armëpushimi i menjëhershëm dhe garantimi i sigurisë detare në Ngushticën e Hormuzit.
Irani i ka dërguar zyrtarisht Shteteve të Bashkuara përgjigjen ndaj propozimit amerikan për ndalimin e luftës, ndërsa mediat iraniane kanë zbuluar detaje nga kushtet dhe kërkesat që Teherani i ka paraqitur Uashingtonit në kuadër të negociatave të fundit diplomatike.
Sipas agjencisë shtetërore iraniane IRNA, përgjigja iraniane iu dorëzua ndërmjetësit pakistanez, i cili po luan një rol kyç në komunikimet indirekte mes Teheranit dhe Uashingtonit, në një moment kur tensionet në Lindjen e Mesme mbeten në nivele të larta.
“Përgjigja e Republikës Islamike të Iranit ndaj tekstit të fundit të propozuar nga Shtetet e Bashkuara për t’i dhënë fund luftës iu dërgua sot ndërmjetësit pakistanez”, raportoi IRNA.
Sipas mediave iraniane, Teherani ka vendosur dy kushte kryesore në qendër të përgjigjes së tij diplomatike. Kërkesa e parë lidhet me “ndërprerjen e menjëhershme të luftës”, ndërsa e dyta me “rivendosjen e sigurisë detare” në Gjirin Persik dhe në Ngushticën strategjike të Hormuzit.
Agjencia ISNA raportoi se përgjigjja iraniane fokusohet ekskluzivisht në mekanizmat për ndalimin e armiqësive dhe menaxhimin e krizës aktuale rajonale, duke lënë jashtë, të paktën në këtë fazë, çështje të tjera politike dhe ushtarake.
Burime iraniane theksojnë se Teherani e konsideron sigurinë në Hormuz si një element thelbësor për çdo marrëveshje të mundshme. Ngushtica e Hormuzit mbetet një nga korridoret më strategjike të energjisë në botë, pasi një pjesë e konsiderueshme e eksporteve globale të naftës dhe gazit kalon përmes saj.
Çdo destabilizim në këtë zonë ka ndikim të menjëhershëm në tregjet ndërkombëtare të energjisë dhe në ekonominë globale. Për këtë arsye, kërkesa iraniane për “siguri detare” shihet jo vetëm si një çështje ushtarake, por edhe si një mesazh politik dhe ekonomik drejtuar Perëndimit dhe vendeve të rajonit.
Pakistani po vepron si kanal komunikimi mes dy palëve, ndërsa diplomacia rajonale po përpiqet të shmangë një përshkallëzim të mëtejshëm të konfliktit. Roli i Islamabadit është bërë gjithnjë e më i rëndësishëm pas tensioneve të fundit në Gjirin Persik dhe rritjes së rrezikut për përballje direkte mes Iranit dhe SHBA-së.
Më herët, zëdhënësi i Ministrisë së Jashtme iraniane kishte deklaruar se “vëzhgimet dhe konsideratat” e Teheranit do të komunikoheshin vetëm pas një analize të plotë të propozimit amerikan.
Nga ana tjetër, Uashingtoni vazhdon të deklarojë publikisht se preferon një zgjidhje diplomatike të konfliktit, megjithëse paralajmëron se opsioni ushtarak mbetet ende mbi tryezë.
Ambasadori amerikan në Kombet e Bashkuara, Mike Waltz, deklaroi në një intervistë për ABC se administrata amerikane po i jep “çdo mundësi të mundshme diplomacisë”.
“Negociatat me Iranin dhe diplomacia janë duke vazhduar, kështu që do të shohim se çfarë na ofrojnë”, tha Waltz.
Ai shtoi se presidenti Donald Trump është i gatshëm të rikthejë operacionet ushtarake nëse përpjekjet diplomatike nuk japin rezultat.
Zbardhja e kërkesave iraniane vjen në një moment kritik për Lindjen e Mesme, ndërsa komuniteti ndërkombëtar po ndjek me shqetësim zhvillimet diplomatike dhe ushtarake që mund të përcaktojnë drejtimin e konfliktit në ditët dhe javët e ardhshme./Pamfleti
Kjo po, asht e gje shume e mire. Asnjera pale nuk ka humbe dhe asnjera pale nuk ka fitu. JANE BARAZIM SHBA-IRAN!!!BRAVO Po IZRALESHI ku ne p….l te s’emes do te shkoje?!