FLASH
Shkruar nga Pamfleti
Teksa kalonin në anën e errët të Hënës dhe vendosnin një rekord të ri për distancën më të madhe të përshkuar ndonjëherë nga njerëzit, astronautët e NASA-s gjetën edhe momente për t’u argëtuar në kushtet e mungesës së gravitetit.
Një video e publikuar nga NASA tregon ekuipazhin e misionit Artemis II duke eksperimentuar me një pikë uji brenda kapsulës Orion. Në pamje, uji formon një sferë të përkryer teksa lëviz lirshëm në kabinë.
Astronauti Jeremy Hansen, për të cilin ky ishte fluturimi i parë në hapësirë, shihet duke vëzhguar përmes sferës së ujit, e cila i përmbys imazhin kokëposhtë. Më pas, ai e “kap” pikën e ujit me një pipëz dhe e lëshon sërish në mikrogravitet.
“Gjatë misionit Artemis II, astronautët kaluan një kohë argëtuese duke luajtur me ujin në mungesën e gravitetit në hapësirë,” shkruan NASA krah videos. “Artemis II ishte fluturimi i parë në hapësirë për astronautin e Agjencisë Hapësinore Kanadeze, Jeremy Hansen kështu që shokët e tij të ekuipazhit i mësuan shumë rreth fizikës së ujit në hapësirë.”
Në Tokë, uji që nuk mbahet në një enë përhapet në formën e një pellgu për shkak të gravitetit. Në hapësirë, megjithatë, ai grumbullohet në formën e një sfere perfekte, pasi molekulat në sipërfaqe tërheqin njëra-tjetrën në mënyrë të barabartë në të gjitha drejtimet, pa forcën e gravitetit që ta sheshojë.
Shkencëtarët shpjegojnë se sfera është forma që ka sipërfaqen më të vogël të mundshme për një vëllim të caktuar, ndaj në kushtet e mikrogravitetit tensioni sipërfaqësor e mbledh ujin në trajtën e një topi.
Eksperimente të ngjashme me ujin janë kryer edhe nga astronautët në Stacionin Ndërkombëtar Hapësinor. Në një prej tyre, astronautët shtrydhnin një copë të lagur për të treguar se si uji lëviz përgjatë sipërfaqes dhe “ngjitet” në dorën e tyre.
Ekuipazhi i Artemis II është rikthyer në Tokë prej rreth një muaji, pas misionit 10-ditor gjatë të cilit përshkuan 406,771 kilometra larg planetit tonë.
Misioni i tyre rreth Hënës dhe kthimi në Tokë theu rekordin e mëparshëm të vendosur nga Apollo 13.
Gjatë kalimit pranë Hënës, astronautët emërtuan gjithashtu dy kratere të reja në sipërfaqen hënore, mes tyre edhe një të quajtur Carroll, në kujtim të bashkëshortes së ndjerë të komandantit të misionit, Reid Wiseman.
Lini një Përgjigje