FLASH
Shkruar nga Pamfleti
Sekretari i Përgjithshëm i NATO-s, Mark Rutte, ka përcjellë një mesazh të qartë në prag të samitit të Aleancës që do të mbahet në Ankara, duke theksuar se forcimi i kapaciteteve mbrojtëse të Evropës është thelbësor për një NATO më të fuqishme dhe më të përgatitur për sfidat e sigurisë.
Në deklaratën e tij përpara takimit të liderëve të vendeve anëtare, Rutte u shpreh se pret që të gjitha shtetet aleate të paraqesin plane konkrete dhe të besueshme për arritjen e objektivit të ri të shpenzimeve për mbrojtjen në nivelin 5% të Prodhimit të Brendshëm Bruto (PBB).
"Ne do të rrisim shpenzimet për mbrojtjen. Do të kemi më shumë burime", deklaroi kreu i NATO-s, duke nënvizuar se investimet më të mëdha në sektorin e mbrojtjes janë të domosdoshme për të garantuar sigurinë kolektive të aleatëve.
Rutte theksoi se vendet anëtare po shtojnë gradualisht investimet në mbrojtje dhe se një Evropë më e fortë ushtarakisht përkthehet në një Aleancë më të aftë për t'u përballur me kërcënimet aktuale dhe të ardhshme.
"Një Evropë e fortë do të thotë një NATO e fortë", u shpreh ai.
Sekretari i Përgjithshëm ritheksoi gjithashtu se mbështetja për Ukrainën do të mbetet një nga prioritetet kryesore të Aleancës. Sipas tij, NATO do të vijojë të forcojë kapacitetet e saj ushtarake, duke shtuar burimet dhe infrastrukturën mbrojtëse përballë sfidave të sigurisë.
"Ne do ta forcojmë edhe më tej aleancën tonë. Në Ankara, vendet do të paraqesin planet e tyre konkrete për objektivin 5%. Do të vazhdojmë të mbështesim Ukrainën, do të kemi më shumë burime dhe baza ushtarake. Duhet të jemi të përgatitur për kërcënimin rus", deklaroi Rutte.
Duke iu referuar zhvillimeve të fundit në Ukrainë, ai dënoi sulmet e reja ruse, duke i cilësuar ato si një tjetër dëshmi të nevojës për të forcuar aftësinë parandaluese të NATO-s.
"Rusia kreu një tjetër sulm të tmerrshëm mbrëmë", tha Rutte, duke theksuar se Aleanca duhet të vazhdojë të investojë në mbrojtje për të garantuar sigurinë e vendeve anëtare dhe stabilitetin në rajonin euroatlantik.
Lini një Përgjigje