FLASH
Shkruar nga Pamfleti
Në një intervistë për BBC Newsnight, disa të mbijetuara ndajnë për herë të parë përvojat e tyre dhe ngrenë dyshime mbi rolin e figurave të fuqishme
Joanna Harrison nuk kishte dashur kurrë të fliste për abuzimin që, sipas saj, kishte përjetuar nga i dënuari për krime seksuale Jeffrey Epstein. Si shumë të mbijetuara të tjera, ajo thotë se përjetimi i kishte shkaktuar turp dhe siklet. Por pasi emri i saj u bë publik pa dashje gjatë publikimit të miliona dokumenteve nga Departamenti amerikan i Drejtësisë, ajo vendosi të flasë.
Në një intervistë për BBC Newsnight me gazetaren Victoria Derbyshire, Harrison u shpreh: “Arrin një moment kur po mbytesh dhe ke nevojë të marrësh frymë, dhe kjo është mënyra ime për të marrë frymë”.
BBC Newsnight mblodhi Harrison dhe katër të mbijetuara të tjera në të njëjtën dhomë për herë të parë. Gjatë diskutimit disaorësh, ato ndanë përvoja të vështira dhe reaguan emocionalisht teksa panë fotografi nga koha kur kishin takuar Epstein.
Të intervistuarat përshkruan përvoja në ishullin privat të Epstein, Little St James, si dhe në fermën e tij në Neë Mexico, të cilën e cilësuan “të ftohtë, të errët dhe të frikshme”. Ato shtuan se besojnë që persona të fuqishëm në rrethin e tij ka të ngjarë të kenë ditur çfarë po ndodhte.
Publikimi i dokumenteve zbuloi identitetin e disa viktimave, pasi pjesë të materialeve nuk ishin redaktuar siç duhet. Harrison ishte ndër personat që humbën anonimitetin. Ajo deklaroi: “Nuk është normale të shohësh fytyrën e abuzuesit tënd çdo ditë për gjashtë vite në televizion”.
Ajo tregoi se e kishte takuar Epstein në Florida në moshën 18-vjeçare dhe se gjithçka kishte nisur me një masazh. “Gjithçka dukej normale,” tha ajo. “Kur ai filloi të masturbohej, unë u paralizova plotësisht. Nuk besoj se thashë dy fjalë gjatë rrugës për në shtëpi”.
Më pas, ajo deklaroi se ishte përdhunuar prej tij në ditëlindjen e tij. Harrison shtoi: “Kam pyetje që nuk do të marrin kurrë përgjigje”.
Në të njëjtën intervistë, Chauntae Davies ndau fotografi të panjohura më parë nga një udhëtim në Afrikë me avionin privat të Epstein, ku ishin të pranishëm edhe Ghislaine Maxwell, aktori Kevin Spacey dhe ish-presidenti amerikan Bill Clinton. Sipas saj: “E përshkrova në ditarin tim si grupin më të larmishëm të njerëzve që mund të bashkosh… ishte si një kamp, sepse udhëtonim në pesë vende në pesë ditë”.
Ajo shtoi: “Ishte një përvojë që ndodh një herë në jetë, dhe fatkeqësisht u njollos nga ajo që ndodhte pas dyerve të mbyllura”.
Davies ka deklaruar se ishte përdhunuar nga Epstein në ishullin e tij privat. Ajo tregoi gjithashtu se kishte kryer një masazh për Clinton gjatë një ndalese në Portugali dhe e kishte përshkruar atë si “të përulur, të sjellshëm dhe karizmatik”. Clinton ka deklaruar më herët se nuk ka qenë në dijeni të abuzimeve.
Në lidhje me fermën Zorro Ranch në New Mexico, Davies tha: “Aty ndodhën shumica e abuzimeve. Aty kam kujtimet e mia më të errëta”. Ajo shtoi se ishte ndjerë “e bllokuar” dhe se vendi kishte “një ndjesi të ftohtë, të errët dhe të frikshme”.
Lisa Phillips, një tjetër e mbijetuar, u shpreh: “Më kujtohet që mendoja: ‘ky vend është vërtet i frikshëm’”.
Phillips tregoi gjithashtu një bisedë me Epstein, ku sipas saj ai kishte thënë: “Më pëlqen të kem gjëra mbi njerëzit”. Ajo shtoi: “Mendoj se i pëlqente që ne ishim të paralizuara nga frika dhe nuk dinim çfarë të bënim”.
Në lidhje me një rast të pretenduar që përfshin Andrew Mountbatten-Windsor, Phillips tha se një shoqe e saj ishte udhëzuar të kryente marrëdhënie seksuale me të. Mountbatten-ëindsor i ka mohuar vazhdimisht akuzat.
Të mbijetuarat shprehën gjithashtu mosbesim ndaj versionit zyrtar për vdekjen e Epstein. “Ne e njihnim atë, e dinim çfarë lloj personi ishte,” tha Phillips.
Në fund të intervistës, ato reflektuan mbi ndikimin afatgjatë të përvojave të tyre. Wendy Pesante tha: “Kur kalon diçka të tillë në një moshë kaq të re, kjo shtrembëron realitetin për një kohë të gjatë”. Ndërsa Harrison u shpreh: “Nuk buzëqesh më njësoj si më parë”.
Rrëfimet e tyre sjellin në vëmendje pasojat e vazhdueshme të çështjes Epstein dhe sfidat që përballen viktimat në kërkimin e drejtësisë.
Lini një Përgjigje