FLASH
Shkruar nga Pamfleti
Aeroplanmbajtësja amerikane USS Gerald R. Ford ka ankoruar në portin e Splitit në Kroaci për riparime dhe mirëmbajtje, pas një periudhe të gjatë operacionale në rajone të ndryshme, përfshirë Lindjen e Mesme.
Sipas raportimit të Reuters, anija – më e reja dhe më e madhja në flotën amerikane – ishte vendosur në Detin e Kuq në mbështetje të operacioneve ushtarake amerikano-izraelite kundër Iranit, kur më 12 mars shpërtheu një zjarr jashtë situatave luftarake në një nga ambientet e brendshme.
Zjarri në dhomën kryesore të lavanderisë plagosi tre marinarë, ndërsa rreth 200 të tjerë morën trajtim mjekësor për probleme të lidhura me thithjen e tymit. Flakët u vunë nën kontroll pas disa orësh dhe shkaktuan dëme që prekën rreth 100 hapësira akomodimi në bord.
Anija ndodhet në mision prej rreth nëntë muajsh dhe, përpara dislokimit në Lindjen e Mesme, kishte marrë pjesë edhe në operacione në Karaibe kundër Venezuelës. Gjatë kësaj periudhe janë raportuar edhe probleme teknike, përfshirë defekte në sistemet hidraulike që kanë ndikuar në funksionimin e qindra tualeteve në bord.
Para mbërritjes në Kroaci, aeroplanmbajtësja kishte ndaluar përkohësisht në bazën detare në Gjirin e Sudës, në ishullin grek të Kretës.
Qeveria kroate, si vend anëtar i NATO-s, miratoi më herët këtë javë praninë e anijes në territorin e saj. Sipas ambasadës amerikane në Zagreb, gjatë qëndrimit në Split, Gerald R. Ford do të presë zyrtarë vendas dhe drejtues të rëndësishëm, në kuadër të forcimit të marrëdhënieve mes SHBA-së dhe Kroacisë.
Mbërritja e kësaj anijeje në Adriatik vjen në një moment të tensionuar ndërkombëtar, duke reflektuar edhe rëndësinë strategjike të rajonit për operacionet dhe logjistikën ushtarake të SHBA-së.
Lini një Përgjigje