FLASH
Shkruar nga Pamfleti
Zëvendëspresidenti në largim i Tajvanit, Lai Ching-te i Partisë Demokratike Progresive (DPP) fitoi zgjedhjet me 40.2 përqind të votave, sipas rezultateve zyrtare afër finale, me votat e numëruara nga 98 përqind e qendrave të votimit.
Lai Ching-te, 64 vjeç, ishte cilësuar si një “rrezik serioz” nga Pekini sepse partia e tij e shpall ishullin de fakto të pavarur. Kina, e cila e konsideron Tajvanin një nga provincat e saj, u kishte kërkuar votuesve të bënin “zgjedhjen e duhur”, me ushtrinë e saj që u zotua të “shtypë” çdo lëvizje për “pavarësi”.
Pas rezultatit të zgjedhjeve, reagoi edhe presidenti amerikan Joe Biden. Ai tha se Shtetet e Bashkuara nuk e mbështesin pavarësinë e Tajvanit, pasi votuesit tajvanezë po kundërshtojnë Kinën dhe i dhanë partisë në pushtet një mandat të tretë presidencial.
"Ne nuk e mbështesim pavarësinë", tha Biden, kur u pyet për zgjedhjet e së shtunës.
Disa orë përpara hapjes së qendrave të votimit, Uashingtoni kishte paralajmëruar se do të ishte e papranueshme për çdo vend që do të ndërhynte në zgjedhje.
Tajvani, një ishull fqinj që Kina pretendon si të vetin, ka qenë një histori suksesi demokratik që nga mbajtja e zgjedhjeve të para të drejtpërdrejta presidenciale në vitin 1996, kulmi i dekadave të luftës kundër sundimit autoritar dhe ligjit ushtarak.
Shtetet e Bashkuara janë mbështetësi dhe furnizuesi më i rëndësishëm ndërkombëtar i Tajvanit me armë, pavarësisht mungesës së lidhjeve zyrtare diplomatike me ishullin.
Sekretari i Shtetit i SHBA, Antony Blinken uroi Lai Ching-te për fitoren e tij dhe tha se Shtetet e Bashkuara janë të përkushtuara për të ruajtur paqen dhe stabilitetin ndër ngushtica, dhe zgjidhjen paqësore të dallimeve, pa detyrime dhe presion. Ai tha se SHBA do të punojë me Lain dhe udhëheqësit e të gjitha partive në Tajvan për të forcuar marrëdhëniet e tyre jozyrtare të gjata, në përputhje me politikën e SHBA-së një Kinë.
Gjithashtu edhe Rusia reagoi për rezultatin e zgjedhjeve ku tha se Tajvani është pjesë e Kinës dhe nuk e mbështesin pavarësinë.
“Pozicioni i Rusisë ndaj Tajvanit është i mirënjohur, konsistent dhe i pandryshueshëm”, tha ministrja e Jashtme, Maria Zakhrarova, në një deklaratë.
Ajo tha se politika është e sanksionuar në disa traktate, për shembull në nenin 5 të Traktatit për Fqinjësinë e Mirë, Miqësinë dhe Bashkëpunimin midis Federatës Ruse dhe Republikës Popullore të Kinës të 16 korrikut 2001.
Në atë klauzolë, Rusia riafirmon pandryshueshmërinë e pozicionit të saj parimor për çështjen e Tajvanit, i cili është përcaktuar në dokumentet politike që janë nënshkruar dhe miratuar nga krerët e të dy shteteve midis 1992 dhe 2000.
Zakharova citoi gjithashtu nga klauzola se pala ruse e pranon se ka vetëm një Kinë në botë, qeveria e Republikës Popullore të Kinës është e vetmja qeveri legjitime që përfaqëson të gjithë Kinën dhe Tajvani është një pjesë integrale e Kinës. Pala ruse e kundërshton pavarësinë e Tajvanit në çdo formë.
Lini një Përgjigje