FLASH
Shkruar nga Pamfleti
Kancelari gjerman Friedrich Merz ka paralajmëruar Francën që të mos devijojë nga marrëveshja fillestare për projektin e përbashkët të avionit luftarak të gjeneratës së pestë, FCAS, pas raportimeve se Parisi kërkon një pjesëmarrje prej 80% në projekt, një ndryshim i konsideruar si kërcënim serioz për bashkëpunimin strategjik franko-gjermano-spanjoll.
Në një dalje publike krahas Sekretarit të Përgjithshëm të NATO-s, Mark Rutte, Merz theksoi: “Duhet të qëndrojmë besnikë ndaj marrëveshjeve të arritura me Francën dhe Spanjën. Nuk mund të ketë përparim nëse partnerët ndryshojnë rregullat në mes të lojës.”
Projekti FCAS, i parashikuar të kushtojë mbi 100 miliardë euro, ka për qëllim të zëvendësojë avionët Rafale dhe Eurofighter duke ndërtuar një platformë të përbashkët ushtarake për vitin 2040. Ai përfshin Dassault (Francë), Airbus (Gjermani) dhe Indra (Spanjë), të cilët janë ndarë në mënyrë të balancuar për zhvillimin e teknologjive.
Sipas burimeve të industrisë, kërkesa franceze për dominim në projekt do të përmbyste ndarjen ekzistuese të punës dhe do të vinte në pikëpyetje kalimin në fazën tjetër të zhvillimit, të parashikuar për fundin e këtij viti.
Merz pranoi se ekzistojnë mospajtime për përbërjen e konsorciumit, por shprehu besim në zgjidhjen e tyre përmes dialogut me Presidentin Macron, me të cilin pritet të takohet këtë muaj në Berlin.
Kjo përplasje ndodh në një moment kur siguria evropiane është më e brishtë se kurrë, dhe bashkëpunimi për teknologjitë e mbrojtjes shihet si një provë e rëndësishme për aftësinë e Bashkimit Europian për të vepruar si një forcë e bashkuar dhe autonome në arenën globale.
Lini një Përgjigje