FLASH
Shkruar nga Pamfleti
Teherani zbulon draftin e marrëveshjes me SHBA-të, përfshihet edhe OKB-ja
Media shtetërore iraniane raportuan se Teherani dhe Uashingtoni kanë përgatitur një draft fillestar për një memorandum mirëkuptimi, që synon uljen e tensioneve ushtarake dhe rikthimin e lundrimit tregtar në Ngushticën e Hormuzit.
Sipas televizionit shtetëror iranian, drafti parashikon që Irani të rikthejë brenda 30 ditësh trafikun tregtar në Hormuz në nivelet para konfliktit. Në këmbim, Shtetet e Bashkuara do të tërhiqnin forcat ushtarake nga zonat pranë Iranit dhe do të hiqnin bllokadën detare ndaj porteve iraniane.
Ngushtica e Hormuzit konsiderohet një nga pikat më strategjike të tregtisë globale, pasi përmes saj kalon një pjesë e madhe e eksporteve botërore të naftës dhe gazit. Çdo zhvillim në këtë korridor detar ndikon drejtpërdrejt në tregjet ndërkombëtare të energjisë dhe në sigurinë rajonale.
Sipas draftit, lëvizja e anijeve tregtare do të menaxhohet në bashkëpunim me Omanin, ndërsa anijet ushtarake nuk përfshihen në marrëveshje. Dokumenti mban emrin “Memorandumi i Islamabadit” dhe parashikon që një marrëveshje përfundimtare të arrihet brenda 60 ditësh. Nëse kjo ndodh, teksti synohet të paraqitet në Këshillin e Sigurimit të OKB-së për miratim si rezolutë detyruese.
Deri tani nuk ka pasur konfirmim zyrtar nga administrata amerikane mbi ekzistencën apo përmbajtjen e draftit të publikuar nga media iraniane.
Ndërkohë, presidenti amerikan Donald Trump reagoi ashpër ndaj mediave amerikane dhe opozitës lidhur me zhvillimet për Iranin. Në një postim në platformën “Truth Social”, Trump deklaroi se edhe në rast se Irani do të dorëzohej plotësisht, mediat amerikane do ta paraqisnin situatën si fitore të Teheranit.
“New York Times, Wall Street Journal, CNN dhe mediat e tjera të lajmeve të rreme do të shkruanin se Irani ka fituar një fitore të madhe ndaj Shteteve të Bashkuara”, shkroi Trump, duke akuzuar demokratët dhe mediat se, sipas tij, “kanë humbur plotësisht kontrollin”. /Pamfleti
Lini një Përgjigje