FLASH
Shkruar nga Pamfleti
Presidenti amerikan vlerësoi se armiqësitë nëse rifillojnë në shkallë të plotë mund të zgjasin për “edhe dy javë të tjera, ndoshta edhe tre”, duke theksuar se “koha nuk është presion për ne, kemi arritur tashmë shumicën e objektivave që donim”.
Presidenti Donald Trump ka deklaruar se Shtetet e Bashkuara e kanë fituar tashmë luftën me Iranin.
"Shtetet e Bashkuara kanë“fituar tashmë përplasjen ushtarake me Iranin", deklaroi Donald Trump gjatë një interviste në radio, duke shmangur megjithatë konfirmimin nëse armëpushimi mbetet në fuqi.
Presidenti amerikan vlerësoi se armiqësitë nëse rifillojnë në shkallë të plotë mund të zgjasin për “edhe dy javë të tjera, ndoshta edhe tre”, duke theksuar se “koha nuk është presion për ne, kemi arritur tashmë shumicën e objektivave që donim”.
“Pavarësisht gjithçkaje, ne po fitojmë. Ose arrijmë marrëveshjen e duhur ose fitojmë shumë lehtë ushtarakisht”, deklaroi ai, duke shtuar: “Kemi fituar tashmë”.
Kur u pyet nëse armëpushimi ka përfunduar pas goditjeve iraniane ndaj Emirateve të Bashkuara Arabe dhe nisjes së operacionit Project Freedom, ai refuzoi të përgjigjet. “Nuk mund t’ju them”, tha ai, duke shtuar se “nëse do të përgjigjesha, do të thoshit se ky njeri nuk është mjaftueshëm i zgjuar për të udhëhequr Shtetet e Bashkuara”.
“Nuk kanë flotë detare, as aviacion, asgjë”
Trump pretendoi gjithashtu se forcat iraniane janë kufizuar në “varka të vogla të shpejta” me mitralozë, duke pohuar se forcat amerikane shkatërruan tetë prej tyre të hënën.
“Çdo gjë që ishte në dispozicion u neutralizua shumë shpejt dhe në mënyrë efektive”, deklaroi ai, duke shtuar se flota fillestare prej 159 anijesh është shkatërruar plotësisht. “Të gjitha ndodhen në fund të detit”, tha ai.
Ai pretendoi gjithashtu se struktura drejtuese e Iranit është goditur rëndë: “Neutralizuam grupin e tyre të parë, të dytin dhe gjysmën e të tretit”, u shpreh, duke shtuar se zyrtarët iranianë “flasin shumë ndryshe kur komunikojnë me mua sesa kur flasin me mediat”.
“Vija e kuqe” uraniumi i pasuruar
Trump konfirmoi se kthimi i rezervave të uraniumit të pasuruar të Iranit është një kusht i panegociueshëm për çdo marrëveshje, megjithëse minimizoi vlerën e tij ushtarake.
“Nga pikëpamja e vlerës nuk është shumë i rëndësishëm. Ndoshta nuk mund të përdoret”, deklaroi ai, duke shtuar: “E duam mbrapsht, e duam 100%”.
Ai theksoi gjithashtu se Irani duhet të kufizojë programin e tij raketor dhe të heqë dorë nga armët bërthamore si kushte për një marrëveshje, por i konsideroi këto çështje dytësore krahasuar me kërkesën kryesore bërthamore.
“Shiko, raketat janë një gjë e keqe, po, dhe duhet të vendosen kufij, por thelbi është që ata nuk duhet të kenë armë bërthamore. Këta të çmendur nuk do të kenë armë bërthamore”, tha ai.
Për organizata si Hamasi, Hezbollah dhe Houthi, ai argumentoi se dobësimi ekonomik i Iranit e bën të pamundur vazhdimin e mbështetjes ndaj tyre.
“Nëse do të largoheshim sot, do t’u duheshin 20 vite për të rindërtuar vendin e tyre”, deklaroi ai.
Shmangie “e qëllimshme” e goditjes së ushtrisë iraniane
Trump tha se SHBA shmangën me qëllim goditjen e ushtrisë konvencionale të Iranit, të cilën e cilësoi “më të moderuar” në krahasim me Gardën Revolucionare, duke iu referuar gabimit të shpërbërjes së ushtrisë irakiane pas luftës në Irak.
Ai shtoi gjithashtu se Garda Revolucionare mund të mos jetë më në gjendje të paguajë ushtarët e saj.
Kuba mund të jetë objektiv i ardhshëm
Në një deklaratë që shkaktoi reagime, ai la të kuptohet se Kuba mund të jetë një objektiv i ardhshëm i veprimit amerikan, duke thënë se “ndoshta, pas kthimit nga Irani, mund të vijë edhe diçka tjetër”. Ai shtoi se do të ishte “nder” të “çlirohej” Kuba, duke përmendur detyrimet ndaj votuesve kubano-amerikanë.
Njëkohësisht, ai kritikoi NATO-n për qëndrimin e saj në konfliktin me Iranin, duke thënë se “nuk ishte aty për ne” dhe duke shprehur dyshime nëse Aleanca do të reagojë në një krizë më të madhe, me referencë të tërthortë ndaj Kinës.
Në fund, ai vlerësoi presidentin e Ukrainës, Volodymyr Zelensky, duke deklaruar se ukrainasit “luftojnë si askush tjetër” përballë “një kundërshtari shumë të madh”.
Lini një Përgjigje